Ціханоўская: Лукашэнка — ваенны злачынец, ён гатовы прадастаўляць тэрыторыю для нападу на краіны НАТО

4 верасня, Позірк. Расія, зноў выкарыстоўваючы тэрыторыю Беларусі, можа зладзіць правакацыі супраць суседзяў Беларусі, якія ўваходзяць у НАТО, заявіла ў інтэрв’ю літоўскаму парталу 15min беларускі дэмакратычны лідар Святлана Ціханоўская.

Гібрыдныя атакі супраць альянсу ўжо адбываюцца, “асабліва ад іх церпяць Літва, Польшча і Латвія”, сказала яна.

“[Аляксандр] Лукашэнка ўжо з’яўляецца ваенным злачынцам. Ён знаходзіцца на баку [Уладзіміра] Пуціна. Ён гатовы прадастаўляць нашу тэрыторыю, нашу інфраструктуру для нападу на НАТО або пагроз у адрас Паўночнаатлантычнага альянсу”, — лічыць палітык.

На яе думку, трэба “зрабіць усё магчымае, каб беларускі народ і беларускія салдаты не былі ўцягнуты ў вайну”. У беларускай арміі, упэўнена дэмлідар, існуюць “абсалютна праўкраінскія і антываенныя настроі”, але кіруючы рэжым разам з Крамлём “здольныя прымусіць людзей пайсці на гэты крок”.

“Мы атрымліваем шмат вельмі адчувальнай інфармацыі непасрэдна з Беларусі. Мы бачым, што ў краіне будуецца новая ваенная інфраструктура. Яе не сталі б ствараць, калі б краіна не рыхтавалася да эскалацыі”, — падкрэсліла Ціханоўская.

Паводле яе слоў, розныя ваенныя аб’екты, інфраструктура будуецца не толькі паблізу ўкраінскай мяжы, але і ўздоўж межаў з Еўрапейскім саюзам; у Беларусі разгорнутыя расійскія комплексы “Арэшнік”, “дзякуючы якім улады выкарыстоўваюць ядзерную пагрозу для шантажу”.

“Таму я думаю, што Расія правярае межы дазволенага — наколькі далёка яна можа зайсці, не сутыкнуўшыся з якой-небудзь рэакцыяй з боку НАТО. І менавіта таму НАТО павінна прадэманстраваць адзінства, сілу і прынцыповасць у гэтым пытанні”, — падкрэсліла Ціханоўская, назваўшы сітуацыю страшнай.

“Я ўпэўнена, што ў выпадку якіх-небудзь правакацый, асабліва больш сур’ёзных, у Літве ці, напрыклад, у Польшчы, вельмі важна, каб Альянс прадэманстраваў адзінства. Напрыклад, каб у Літву былі накіраваны дадатковыя сілы, паказваючы, што мы стаім разам і не дазволім пагражаць краінам, якія з’яўляюцца суседзямі Расіі”, — сказала Ціханоўская.

На яе думку, цяпер усе намаганні НАТО павінны быць сканцэнтраваны на ўкраінскім напрамку, “таму што менавіта там, на палях бітваў ва Украіне, вырашаецца лёс не толькі Украіны, але і ўсёй Еўропы”.

Калі ў адзінстве НАТО “з’явіцца шчыліна”, яму можа пагражаць прапаганда, каб “раскалоць краіны, партыі, людзей”, сказала Ціханоўская.

Мінск падтрымлівае Маскву ў развязанай ёю 24 лютага 2022 года поўнамаштабнай вайне супраць Украіны.