26-гадовая кіроўца загінула ў ДТЗ у Аршанскім раёне

7 верасня, Позірк. Аб смяротным дарожна-транспартным здарэнні ў Аршанскім раёне паведамляе Дзяржаўтаінспекцыя Віцебскай вобласці.

Аварыя здарылася 6 верасня каля 14 гадзін паблізу вёскі Грышаны.

Паводле папярэдняй інфармацыі, 26-гадовая кіроўца аўтамабіля “Сітраен” пры здзяйсненні абгону не справілася з кіраваннем, дапусціла занос і з’ехала ў кювет.

У выніку ДТЗ яна загінула.

У 2025 годзе колькасць дарожна-транспартных здарэнняў у Беларусі знізілася на 5,5% (з 3.453 да 3.262), вынікае з праведзенага “Позіркам“ аналізу даных Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўмаваных — на 8,4% (з 3.804 да 3.483).