Лукашэнка адправіцца ў Туркменістан на саміт СНД

7 кастрычніка, Позірк. Аляксандр Лукашэнка прыме ўдзел у пасяджэнні саміту СНД, які пройдзе ў Туркменістане. Пра гэта расійскім СМІ паведаміў памочнік прэзідэнта РФ Юрый Ушакоў.

Саміт адбудзецца ў Нацыянальнай турыстычнай зоне “Аваза” (каля горада Туркменбашы).

Ушакоў таксама анансаваў удзел у мерапрыемстве прэзідэнтаў Уладзіміра Пуціна (РФ), Ільхама Аліева (Азербайджан), Касыма-Жамарта Такаева (Казахстан), Эмамалі Рахмона (Таджыкістан), Шаўката Мірзіёева (Узбекістан), Садыра Жапарава (Кыргызстан), Сердара Бердымухамедава (Туркменістан), а таксама прэм’ер-міністра Арменіі Нікола Пашыняна.

На пасяджэнне ў пашыраным складзе запрошаны прэзідэнт Ірана Масуд Пезешкіян.

Саміт пачнецца 9 кастрычніка.

Папярэдні саміт СНД прайшоў год таму ў Душанбэ (Таджыкістан).

МЗС паведаміў напярэдадні, што міністр замежных спраў Максім Рыжанкоў 7–9 кастрычніка наведае з візітам Туркменістан, дзе возьме ўдзел у пасяджэнні Савета міністраў замежных спраў СНД.