Стрыечнага брата палітыка Паўла Латушкі прыгаварылі да шасці гадоў калоніі

20 верасня, BPN. Суд Цэнтральнага раёна Мінска прыгаварыў палітвязня Анатоля Латушку да шасці гадоў калоніі, паведамляе праваабарончы цэнтр “Вясна”.

Мужчыну таксама аштрафавалі на 300 базавых велічыняў (9.600 рублёў).

Палітзняволеных Алену Маліноўскую і Лілію Ананян, якія праходзілі па той жа справе, прыгаварылі адпаведна да 4 гадоў калоніі і 5 гадоў абмежавання волі без накіравання ў папраўчую ўстанову.

Суддзя Дзмітрый Карсюк прызнаў Анатоля Латушку вінаватым паводле арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), арт. 370 (знявага дзяржаўных сімвалаў), ч. 2 арт. 339 (хуліганства, здзейсненае групай асоб) Крымінальнага кодэкса, Ананян — арт. 339, Маліноўскую — арт. 339 і арт. 370.

Ананян прызнала віну, Латушка і Маліноўская — не.

Усіх траіх затрымалі ў ноч на 31 студзеня за тое, што яны нібыта малявалі на паштовых скрынях у пад’ездах дома герб “Пагоня”.

25 жніўня затрымалі жонку Анатоля Латушку Алену. У яе дома адбыўся вобшук у межах расследавання крымінальнай справы паводле арт. 342 КК.

45-гадовы Анатоль Латушка — стрыечны брат беларускага палітыка, кіраўніка Народнага антыкрызіснага ўпраўлення і члена Аб’яднанага пераходнага кабінета, былога дыпламата і чыноўніка Паўла Латушкі.

У Беларусі супраць Паўла Латушкі распачата восем крымінальных спраў, паводле некаторых артыкулаў магчыма вынясенне смяротнага прысуду.

Сёлета 28 студзеня стала вядома, што Дэпартамент фінансавых расследаванняў Камітэта дзяржкантролю распачаў крымінальную справу ў дачыненні да дачкі палітыка Яны Латушкі, якая знаходзіцца за мяжой. Артыкул КК невядомы.