Кіраўнік КДБ сцвярджае, што ў Беларусі затрымалі ўкраінскага шпіёна і двух завербаваных ім беларусаў (абноўлена)

20 кастрычніка, BPN. У Беларусі затрымалі ўкраінскага шпіёна і двух завербаваных ім беларусаў, заявіў 20 кастрычніка старшыня Камітэта дзяржаўнай бяспекі Іван Церцель.

“Затрыманы рэзідэнт, грамадзянін Украіны, а таксама двое нашых грамадзян, якія ўступілі на шлях здрады і працавалі ў інтарэсах замежнай дзяржавы”, — сцвярджае чыноўнік. Паводле яго слоў, паводле факту шпіянажу і здрады дзяржаве ўзбуджана крымінальная справа.

Церцель таксама паведаміў, што арыштаваны “былы вайсковец падпалкоўнік”, які нібыта працаваў на Службу бяспекі Украіны. У рамках гэтай справы ён згадаў нейкія сустрэчы, якія праводзіліся “у тым ліку ў Адэсе, у іншых гарадах, на тэрыторыі трэціх дзяржаў”.

Паводле слоў кіраўніка КДБ, у Беларусь “закідваецца вялікая колькасць грамадзян Украіны, якія затрымліваюцца ў розных рэгіёнах краіны”.

“Мы стараемся ў кожным выпадку ўнікнуць па-чалавечы. Бываюць такія моманты, калі разабраўшыся, у рамках жэсту добрай волі мы дазваляем гэтым грамадзянам выбыць на тэрыторыю сумежнай дзяржавы”, — заявіў Церцель.

Абнаўленне.

У эфіры навін тэлеканала “Беларусь 1” вечарам 20 кастрычніка са спасылкай на КДБ паведамілі, што супраць затрыманага грамадзяніна Украіны Паўла Купрыенку ўзбуджана крымінальная справа ў сувязі з “агентурнай дзейнасцю”.

Таксама затрыманы двое грамадзян Беларусі — Тарас Мачынскі і Зміцер Салавянчык. У дачыненні да іх распачалі крымінальныя справы аб “здрады дзяржаве”.

Сцвярджаецца, што затрыманыя збіралі і перадавалі даныя аб размяшчэнні чыгуначных вузлоў і перамяшчэнні ваеннай тэхнікі.