НАУ апублікавала спіс беларускіх парламентарыяў, якія трапілі пад нацыянальныя санкцыі Польшчы

29 снежня, BPN. Рашэннямі міністра ўнутраных спраў і адміністрацыі Польшчы супраць 11 беларускіх парламентарыяў і супрацоўнiцы сакратарыята Палаты прадстаўнікоў дзейнічаюць раней уведзеныя персанальныя санкцыі. Народнае Антыкрызіснае кіраванне (НАУ) апублікавала 29 снежня адпаведны спіс.

У яго ўвайшлі члены Савета Рэспублікі Дзмітрый Варанюк, Канстанцін Драздоўскі, Сяргей Рачкоў, Алег Румо, а таксама дэпутаты Палаты прадстаўнікоў Валерый Варанецкі, Святлана Горваль, Дзяніс Карась, Іван Мамайка, Андрэй Савіных, Сяргей Стэльмашонак, Ігар Таўтынь.

Пад санкцыі трапіла таксама намеснік начальніка ўпраўлення міжнароднага супрацоўніцтва сакратарыята Палаты прадстаўнікоў Ганна Семянюк.

НАУ падкрэсліла, што прычынай уключэння названых асоб у спіс з’яўляецца “парушэнне правоў чалавека, у тым ліку шматлікія выпадкі пераследу актывістаў Саюза палякаў у Беларусі, незаконны арышт Анджэя Пачобута і Анжалікі Борыс, іншыя варожыя дзеянні рэжыму ў дачыненні да Польшчы”.