У “спіс экстрэмістаў” дададзена яшчэ 22 чалавекі, сярод іх адвакат Юргілевіч, журналіст Мажэйка, сын Лябедзькі

17 лістапада, Позірк. У пералік асоб, “датычных да экстрэмісцкай дзейнасці” дададзена яшчэ 22 чалавекі, цяпер у ім 3.520 прозвішчаў, вынікае з абноўленага дакумента на сайце Міністэрства ўнутраных спраў.

Усе ўнесеныя ў спіс асуджаныя і адбываюць пакаранне па “пратэстных” крымінальных артыкулах.

11 з іх прызнаныя палітвязнямі.

У пералік уключаны адвакат Юлія Юргілевіч і кіраўнік ліквідаванай уладамі гродзенскай арганізацыі “Цэнтр гарадскога жыцця”, журналіст Павел Мажэйка, прыгавораныя ў рамках адной справы да 6 гадоў пазбаўлення волі за “садзейнічанне экстрэмісцкай дзейнасці” (ч.2 арт. 361⁴ КК).

Таксама ў спісе Арцём Лябедзька — сын палітыка Анатоля Лябедзькі, асуджаны на 3,5 гады зняволення за “фінансаванне дзейнасці экстрэмісцкага фарміравання” (арт. 361² КК).

Акрамя гэтага, “экстрэмістамі” прызначаныя 65-гадовы прадпрымальнік Пётр Старацітараў (прысуд — 5 гадоў пазбаўлення волі), 68-гадовая пенсіянерка Наталля Пятровіч (6 гадоў), Дзмітрый Загаловец (3,5 года), Сяргей Адаська (2,5 года), Аляксандр Коваль (2,5 года), Аляксандр Пабяржын (1,5 года), экс-менеджар па міжнародных перавозках кампаніі “Трансглабал” Сяргей Мардзіловіч (прысуд невядомы).

У спіс унесены IT-спецыяліст з Сеніцы (Мінскі раён) Дзмітрый Маставы, асуджаны на 10 гадоў пазбаўленне волі па справе аб дыверсіі на ваенным аэрадроме ў Мачулішчах, у выніку якой быў пашкоджаны расійскі самалёт А‑50. Маставы прызнаны вінаватым паводле арт. 356 (здрада дзяржаве) і арт. 361⁴ КК.