29 лістапада, Позірк. Па падазрэнні ў атрыманні хабару затрыманы генеральны дырэктар ААТ “Бярозаўскі мясакансервавы камбінат” (Брэсцкая вобласць) Уладзімір Жуковіч, паведамляе дзяржаўны тэлеканал АНТ.
Распачатая “яшчэ адна гучная справа па частцы дзелавой карупцыі”, адзначаецца ў тэлеэфіры.
Паведамляецца, што Жуковіч затрыманы “на пару з камерсантам”. У рэпартажы гаворыцца пра “канспіратыўныя сустрэчы” і “хітрыя схемы са сваякамі”. “Празмерны апетыт фігурантаў” з “замашкамі з 90‑х” забяспечыў ім “жыццё на шырокую нагу” і “плойму маёмасці”.
“Паважаныя людзі прымудраюцца штурхаць палымяныя прамовы аб недапушчальнасці крадзяжу і пры гэтым прызначаць сустрэчы для перадачы хабару”, — гаворыцца ў тэлеанонсе з адсылкай на поўны выклад гісторыі ў вячэрнім эфіры.
Жуковіч названы “мацёрым хабарнікам і карупцыянерам, які даўным-даўно паблытаў сваё з грамадскім”.
Пра затрыманне Жуковіча 14 лістапада паведаміла “Наша Ніва”. Паводле інфармацыі выдання, затрыманне звязанае з хабарам ад дылера прадукцыі завода і адбылося не ў рамках разгорнутай КДБ “малочнай справы”.
Бярозаўскі мясакансервавы камбінат — найбуйнейшае ў Беларусі прадпрыемства па перапрацоўцы мяса. Яму падпарадкаваныя некалькі прадпрыемстваў у Брэсцкай вобласці, уключаючы Баранавіцкі мясакамбінат.
Гл. таксама:
