Віцэ-прэм’ер Пархомчык анансаваў вытворчасць у Беларусі 12-мясцовых самалётаў ЛМС-401 у супрацоўніцтве з РФ

21 жніўня, Позірк. У Беларусі ў супрацоўніцтве з Расіяй плануецца пачаць вытворчасць лёгкіх 12-мясцовых самалётаў мадэлі ЛМС-401, паведаміў намеснік прэм’ер-міністра Пётр Пархомчык 20 жніўня ў эфіры праграме “Контуры” на тэлеканале АНТ.

Паводле яго слоў, адпаведнае пагадненне было падпісанае падчас ліпеньскага візіту прэм’ер-міністра Рамана Галоўчанкі ў Екацярынбург.

Зараз праект знаходзіцца на этапе “распрацоўкі доследна-канструктарскіх работ”.

“Спатрэбіцца ўдзел 407-га завода і 558-га завода Баранавічаў (Мінскі завод грамадзянскай авіяцыі і авіярамонтны завод у Брэсцкай вобласці адпаведна. — “Позірк”.), спатрэбіцца будаўніцтва дадатковых вытворчых магутнасцей у частцы механаапрацоўкі, у частцы будаўніцтва корпуса для зборкі гэтых самалётаў”. — сказаў чыноўнік.

“Часу мы абсалютна не маем, гэта трэба рабіць хутка аператыўна. Нашы прамысловыя прадпрыемствы ўжо ўступілі ў цесную кааперацыю з прадпрыемствамі Расійскай Федэрацыі, якія вырабляюць іншыя лятучыя апараты, самалёты. Мы таксама ўжо бярэм на сябе абавязацельствы пастаўкі і апрацоўкі пэўных камплектуючых для пастаўкі дэталяў на канвеер Расійскай Федэрацыі. Таму тэма абсалютна патрэбная, гэта новы вектар развіцця, хопіць нешта рамантаваць, час лятаць на сваіх самалётах”, — дадаў ён.

Адметна, што інфармацыі пра ЛМС-401 у адкрытым доступе няма. Вядома толькі пра мадэль ЛМС-901, распрацаваную кампаніяй “Байкал-Інжынірынг” (даччынае прадпрыемства Уральскага завода грамадзянскай авіяцыі). Існуе ў выглядзе доследнага ўзору, вытворчасць плануецца пачаць у 2023 годзе.

У сярэдзіне ліпеня Галоўчанка заявіў у інтэрв’ю расійскаму тэлеканалу РБК, што ўзор сумеснага беларуска-расійскага самалёта з’явяцца праз тры гады, яшчэ год ці два спатрэбяцца, каб самалёт выйшаў у рэйс.

11 жніўня Аляксандр Лукашэнка не выключыў магчымасць вытворчасці ў Беларусі цывільных паветраных суднаў.

Гл. таксама:

Галоўчанка: Узор сумеснага беларуска-расійскага самалёта з’явіцца праз тры гады

Лукашэнка арыентаваў Мінскі завод грамадзянскай авіяцыі на стварэнне свайго самалёта і асваенне “вайсковых напрамкаў”