Беларусь мае намер “паглыбіць стратэгічнае супрацоўніцтва” з РФ у галіне атамнай энергіі

5 снежня, Позірк. Праект мемарандума паміж урадамі Беларусі і Расіі аб “паглыбленні стратэгічнага супрацоўніцтва” ў галіне выкарыстання атамнай энергіі ў мірных мэтах і сумежных высокіх тэхналогій ухвалены ў якасці асновы для правядзення перагавораў, вынікае з пастановы Савета міністраў № 853 ад 1 снежня.

Згодна з дакументам, апублікаваным 5 снежня на Нацыянальным прававым інтэрнэт-партале, правесці перагаворы па праекту мемарандума, пры неабходнасці нязначна яго адкарэктаваць і ў выніку падпісаць упаўнаважаны Дзяржаўны камітэт па навуцы і тэхналогіях.

У 2023 годзе паблізу Астраўца (Гродзенская вобласць) завяршылася збудаванне Беларускай АЭС. Станцыя пабудаваная ў супрацоўніцтве з расійскай дзяржкарпарацыяй “Расатам”.

Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня гэтага года. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.