КДБ прызнаў “экстрэмісцкім фарміраваннем” “Белорусско-грузинско-украинский чат “Россия это зло”

15 снежня, Позірк. Тэлеграм-чат “Белорусско-грузинско-украинский чат “Россия это зло” 12 снежня прызнаны Камітэтам дзяржаўнай бяспекі Беларусі “экстрэмісцкім фарміраваннем”, паведамляе праваабарончы цэнтр “Вясна”.

У рашэнні пазначаны людзі, якія нібыта маюць дачыненне да чату: Павел Турчанінаў, Станіслаў Лупаносаў, Ева Рамазанава, Міхаіл Майсак, Дзмітрый Няўгеня, Вольга Сінялёва, Руслан Зубкоў. У чаце ўсяго 120 чалавек, а ў яго апісанні пазначана, што “дадзены чат быў створаны ў сувязі з засіллем маскалёў сярод адміністратараў рускамоўных чатаў у Грузіі”.

У замацаваным паведамленні адміністратараў чату, у прыватнасці, гаворыцца: “Паважаныя падпісчыкі, існуе верагоднасць, што гэты чат рана ці позна прызнаюць экстрэмісцкім, таму хачу нагадаць тым з вас, якія знаходзяцца ў Беларусі, аб неабходнасці прымаць меры засцярогі: хаваць нумар свайго тэлефона, не ставіць сваю сапраўдную фатаграфію ў профіль, не ўказваць сваю сапраўдную прозвішча ў “Тэлеграме” і г.д.”.