Латушка прапанаваў Мінюсту Польшчы стварыць сумесную з НАУ працоўную групу для “забеспячэння адказнасці Лукашэнкі”
5 студзеня, Позірк. Кіраўнік Народнага антыкрызіснага ўпраўлення (НАУ) Павел Латушка прапанаваў Міністэрству юстыцыі Польшчы стварыць працоўную групу з мэтай “распрацоўкі і рэалізацыі канкрэтных механізмаў забеспячэння крымінальнай адказнасці Лукашэнкі”.
З адпаведнай ініцыятывай Латушка звярнуўся на намесніка міністра юстыцыі Польшчы Кшыштафа Сьмішака падчас іх сустрэчы 5 студзеня, паведамляе прэс-служба Аб’яднанага пераходнага кабінету (АПК).
Адзначаецца, што таксама кіраўнік НАУ праінфармаваў Сьмішака пра бягучую абстаноўку ў Беларусі, “штодзённыя рэпрэсіі і гвалт” супраць беларускіх грамадзян, “ваенныя злачынствы, учыненыя вышэйшым ваенна-палітычным кіраўніцтвам рэжыму Лукашэнкі ў дачыненні да грамадзянскіх асоб ва Украіне, галоўным чынам непаўналетніх”.
Акрамя гэтага, польскаму боку была агучана просьба аб “садзейнічанні ў адвакатаванні ў Міжнародным крымінальным судзе” пытання адказнасці Лукашэнкі за “ўчыненыя ім ваенныя злачынствы і злачынствы супраць чалавечнасці”.
Сьмішак адзначыў, што Варшавай будуць прыкладзеныя неабходныя намаганні для прыцягнення Лукашэнкі да адказнасці ў рамках міжнародных крымінальных механізмаў і прапанаваў працягнуць кантакты, каб забяспечыць рэалізацыю абмеркаваных пытанняў.
Польскі чыноўнік адзначыў, што Міністэрства юстыцыі будзе надаваць “асаблівую ўвагу аднаўленню ў правах ахвяр грубых парушэнняў правоў чалавека ў Беларусі” і “не дасць забыць пра Беларусь на міжнароднай арэне”.
Гл. таксама:
Латушка абмеркаваў з новым спікерам польскага сената праблемы палітзняволеных і дыяспары
Латушка прапануе заключыць пагадненне паміж беларускімі дэмсіламі і Еўрапарламентам (абноўлена)
Латушка абмеркаваў з амбасадарамі пры Савеце Еўропы прыцягненне рэжыму Лукашэнкі да адказнасці
