У парламенце Фінляндыі створана група “За дэмакратычную Беларусь”

16 студзеня, Позірк. Фінляндыя стала 24 краінай, у парламенце якой створана група “За дэмакратычную Беларусь”, паведаміў дарадца Святланы Ціханоўскай па міжпарламенцкім супрацоўніцтве Анатоль Лябедзька.

Адпаведная дамоўленнасць, удакладніў ён, была дасягнута 11 студзеня ў Хельсінкі падчас яго і Ціханоўскай сустрэчы са спікерам фінскага парламента Юссі Хала-Аха.

“Мы прамовілі некаторыя пункты супольнай працы: па-першае — магчымасць стажыровак для маладых беларусаў у парламенце Фінляндыі. Другі пункт — рэцэнзіі і прававая экспертыза праектаў законаў для новай Беларусі. Трэці пункт — супрацоўніцтва ў міжнародных арганізацыях”, — сказаў Лябедзька. 

Паводле яго слоў, стварэнне групы азначае прыняцце дэпутатамі абавязку “працаваць па Беларусі, дапамагаць беларусам”.

Лябедзька нагадаў, што 25 студзеня ў Страсбургу ў рамках зімовай сесіі Парламенцкай асамблеі Савета Еўропы (ПАСЕ) чакаецца прыняцце рэзалюцыі па Беларусі. Дакумент будзе зацверджаны па выніках даклада кіраўніка фінскай групы “За дэмакратычную Беларусь” Кіма Кільюнена. 

10 студзеня Лябедзька паведаміў, што прынятае рашэнне пра фарміраванне асобных груп “За дэмакратычную Беларусь” у сейме і сенаце Польшчы. Агульная група ў парламенце Польшчы існавала з ліпеня 2020 года.

Парламенцкія групы “За дэмакратычную Беларусь” створаныя ў дзяржавах Еўрасаюза, Нарвегіі, ЗША, Вялікабрытаніі, Украіне. У сакавіку 2023 года было абвешчана аб стварэнні альянсу гэтых груп. Першая сустрэча прадстаўнікоў альянсу адбылася ў лістападзе.