18 кастрычніка, Позірк. Абстаноўка, створаная для праверкі баявой гатоўнасці беларускіх войскаў, распрацаваная на аснове вынікаў “аналізу вядзення ваенных дзеянняў” ва Украіне, заявіў 18 кастрычніка дзяржаўны сакратар Савета бяспекі Аляксандр Вальфовіч на Гожскім палігоне ў Гродзенскай вобласці.
Паводле яго слоў, якія перадае прэс-служба Міністэрства абароны, “вялікую ролю” пры праверцы адыгрывае досвед, які беларускія вайскоўцы атрымліваюць ад інструктараў з расійскай групоўкі “Вагнер”.
“Асаблівасць гэтай праверкі заключаецца ў тым, што войскі здзейснілі маршы камбінаваным спосабам на палігоны і ўчасткі мясцовасці. Асаблівасцю таксама з’яўляецца адпрацоўка пытанняў па ўзаемадзеянні і прымяненні штурмавой авіяцыі. Надаецца ўвага ўменню камандзіраў падраздзяленняў прымяняць беспілотную авіяцыю”, — заявіў Вальфовіч.
“Можна сказаць, што нашы ваеннаслужачыя здольны выканаць пастаўленыя задачы”, — дадаў ён.
Кажучы пра вагнераўцаў, Вальфовіч адзначыў, што іх удзел — гэта “вялікая дапамога для якаснай падрыхтоўкі”. “Іх прафесіяналізм і ўменне вельмі запатрабаваны ў нашых войсках. Мы гэта выкарыстоўваем і выкарыстоўваем на практыцы”, — сцвярджае дзяржсакратар Савета бяспекі.
Чарговы этап праверкі баявой гатоўнасці Узброеных сіл праходзіць з 3 кастрычніка.
На фоне вайны ва Украіне і падтрымкі расійскай агрэсіі ўладамі ў Мінску беларускае войска пастаянна праводзіць вучэнні. Праведзены пераўлік асоб прызыўнога ўзросту, зніжаныя патрабаванні да стану здароўя патэнцыйных салдат.
Аўтарызавацца
Забыліся пароль?
Выхад з профілю
