Мінюст праз суд дамагаецца ліквідацыі аб’яднання “Дыпламатыя” з 30-гадовай гісторыяй
Лагатып БРАА "Дыпламатыя"
1 лютага, Позірк. Мінскі гарадскі суд 13 лютага разгледзіць іск Міністэрства юстыцыі аб ліквідацыі рэспубліканскага грамадскага аб’яднання “Дыпламатыя”, вынікае з раскладу на партале электроннага судаводства.
Суддзя Вольга Паланавіч пачне працэс у 14:00.
Паводле звестак з Адзінага дзяржаўнага рэгістра, аб’яднанне “Дыпламатыя” зарэгістраваная 22 лютага 1993 года.
На сайце арганізацыі пазначана, што яна “ўмацоўвае дэмакратычныя інстытуты і падтрымлівае грамадзянскую супольнасць”, імкнецца “ўмацоўваць прававую базу і кіраўнічую практыку для падвышэння эфектыўнасці мер урада ў адказ”, падвышаць “уплыў грамадскіх інтарэсаў у прыняцці важных для краіны рашэнняў” ды інш. У ліку сваіх каштоўнасцяў “Дыпламатыя” называе “свабоду, павагу правоў чалавека і правядзенне сумленных выбараў”.
З 2017 года аб’яднанне ўзначальвае экс-кандыдат у прэзідэнты на выбарах 2020 года, старшыня дэ-юрэ ліквідаванай партыі “Беларуская сацыял-дэмакратычная Грамада” Сяргей Чэрачань. Ганаровым членам “Дыпламатыі” з’яўляецца экс-кандыдат у прэзідэнты на выбарах 2010 года Віктар Цярэшчанка.
