НДЭІ Мінэканомікі: Мацней за ўсё наступствы рэгулявання цэн адчулі вытворцы хімічных прадуктаў

19 студзеня, Позірк. У прамысловасці найбольшы ўплыў дзяржаўнага рэгулявання коштаў адчулі вытворцы хімічных прадуктаў і прадуктаў харчавання. Пра гэта сведчаць вынікі апытання бізнесу, праведзенага Навукова-даследчым эканамічным інстытутам (НДЭІ) Міністэрства эканомікі.

Агулам толькі 11% апытаных кіраўнікоў прамысловых прадпрыемстваў заявілі, што выкананне нормаў пастановы № 713 аб рэгуляванні коштаў стрымлівае вытворчасць, паведамляе “Эканамічная газета”.

Аб негатыўных наступствах пастановы № 713 заявілі 27% апытаных прадстаўнікоў вытворчасцей хімпрадуктаў, 20% — сярод вытворцаў прадуктаў харчавання, 17% — фармацэўтычных прадуктаў, 16% — тэкстыльных вырабаў.

Найменшы ўплыў рэгулявання цэн адзначаны сярод прадпрыемстваў металургіі (5%), вытворцаў транспартных сродкаў (4%), гумавых і пластмасавых вырабаў (4%).

6 кастрычніка 2022 года па выніках праведзенай у той жа дзень нарады Аляксандр Лукашэнка падпісаў дырэктыву № 10 “Аб недапушчальнасці росту цэн”.

19 кастрычніка з’явілася пастанова ўрада № 713 “Аб сістэме рэгулявання цэн” у першай рэдакцыі.

29 снежня 2023 года была прынята ўжо чацвёртая рэдакцыя дакумента, згодна з якой без узгаднення з дзяржорганамі дазваляецца павышэнне цэн не больш як на 0,3% штомесяц на тавары, якія кантралююцца (усяго 331 пазіцыя, 124 адносяцца да харчавання, 207 — да нехарчовых тавараў).

У выніку Міністэрства антыманапольнага рэгулявання і гандлю рэгулюе каля 85% цэн на спажывецкім рынку, заявіў яго кіраўнік Аляксей Багданаў 19 студзеня.