У двухпалатным парламенце Польшчы ствараецца адзіная група “За дэмакратычную Беларусь” — Лябедзька

22 лютага, Позірк. Сейм і Сенат Польшчы адмовіліся ад канцэпцыі паралельных дэпутацкіх міжфракцыйных груп “За дэмакратычную Беларусь” і вырашылі стварыць адзіную групу, паведаміў дарадца дэмакратычнага лідара Святланы Ціханоўскай па парламенцкім супрацоўніцтве і канстытуцыйнай рэформе Анатоль Лябедзька.

Паводле яго інфармацыі, групу ўзначаляць дэпутат Сейма, старшыня Парламенцкай асамблеі НАТО Міхаіл Шчэрба і віцэ-спікер Сената Міхал Каміньскі.

У склад групы ад Сената ўвойдуць 12 чалавек, у тым ліку два віцэ-спікеры, былы спікер, кіраўнікі камітэтаў па міжнародных справах і еўрапейскіх справах і “легенда прафсаюза “Салідарнасць” Багдан Барусевіч, адзначыў Лябедзька.

4 студзеня палітык заявіў, што ў польскім парламенце плануецца стварыць асобныя групы “За дэмакратычную Беларусь” у кожнай з палат.

Новы склад польскага парламента быў абраны ў кастрычніку 2023 года, першыя сесіі ніжняй і верхняй палат прайшлі 13 лістапада.

У папярэднім складзе польскага заканадаўчага органа таксама функцыянавала адзіная група “За дэмакратычную Беларусь”, створаная ў ліпені 2020 года.

Паводле звестак дэмсіл, цяпер такія групы функцыянуюць у 23 нацыянальных парламентах. У сакавіку 2023 года было абвешчана аб стварэнні альянсу гэтых груп. Першая сустрэча прадстаўнікоў альянсу адбылася ў лістападзе.