“Вясна”: За два гады за антываенную пазіцыю ў Беларусі рэпрэсавана каля 1,7 тыс. чалавек

22 февраля, Позірк. Пасля поўнамаштабнага ўварвання Расіі ва Украіну беларусы актыўна праяўлялі антываенную пазіцыю: “ладзілі пікеты, псавалі чыгуначнае абсталяванне, каб запаволіць рух расійскай ваеннай тэхнікі”, цяпер “дапамагаюць у інфармацыйнай вайне”, ваююць на ўкраінскім баку. Пра гэта гаворыцца ў справаздачы праваабарончага цэнтра “Вясна”, апублікаванай напярэдадні другой гадавіны пачатку вайны.

Пасля 24 лютага 2022 года за праяву антываеннай пазіцыі ў Беларусі было затрымана не менш за 1.671 чалавека. 94 з іх асуджаныя паводле крымінальных спраў на тэрмін ад 1 да 23 гадоў, адзначаюць праваабаронцы.

Паводле іх даных, па стане на 23 лютага 2024 года ў Беларусі налічваецца 13 асуджаных за дыверсіі на чыгунцы — агулам на 199,5 года пазбаўлення волі. 

За перадачу фота і відэа расійскай ваеннай тэхнікі незалежным медыярэсурсам асуджана не менш за 37 чалавек, за намер ваяваць на баку Украіны — мінімум 15.

Не менш за 38 чалавек зазналі пераслед за публічнае асуджэнне расійскай агрэсіі і праяву салідарнасці з Украінай, 14 асуджана за грашовыя ахвяраванні беларускім добраахвотнікам. 

За першыя паўтара месяца вайны за антываенныя акцыі ў Беларусі было затрымана больш за 1,5 тыс. чалавек, адзначаецца ў справаздачы. 

“У нашай краіне да гэтага часу пераследуюць за адкрытую падтрымку Украіны і падвяргаюць адміністрацыйнаму арышту”, — падкрэслілі праваабаронцы.

Найбольш масавыя антываенныя акцыі ў Беларусі прайшлі 27 і 28 лютага 2022 года. За двое сутак затрымалі больш за 1.1 тыс. чалавек. Удзельнікаў антываенных акцый пераследавалі за нашэнне жоўта-сіняй сімволікі, надпіс “Не вайне” на вопратцы, ускладанне кветак каля пасольства Украіны ў Мінску. Беларусы пратэставалі не толькі ў сталіцы, але і ў большасці рэгіёнаў краіны.

Затрыманыя на мітынгах падвяргаліся катаванням з боку сілавікоў, адзначаецца ў справаздачы. Пратэстоўцаў жорстка збівалі ў аддзяленнях міліцыі, адкуль некаторых дастаўлялі ў бальніцу.