Галоўная вайсковая інспекцыя Мінабароны занялася праверкай 85-й брыгады сувязі

6 сакавіка, Позірк. “Усе віды дзейнасці” 85-й брыгады сувязі будуць правераны камісіяй галоўнай ваеннай інспекцыі Узброеных сіл, паведамляе прэс-служба Міністэрства абароны.

“Падчас інспектавання будуць вызначаны: узровень баявой і мабілізацыйнай гатоўнасці, баявой падрыхтоўкі і кіраўніцтва паўсядзённай дзейнасцю, здольнасць выконваць задачы па прызначэнні. Таксама будзе правераны стан узбраення, вайсковай і спецыяльнай тэхнікі, запасаў матэрыяльных сродкаў”, — гаворыцца ў рэлізе вайсковага ведамства.

Чакаецца, што ў рамках мерапрыемства вайскоўцы прадэманструюць “навыкі і ўменні на кантрольных занятках па агнявой, фізічнай, ідэалагічнай, тактыка-спецыяльнай падрыхтоўцы і іншых прадметах”.

85-я брыгада (дыслакуецца ў Баранавічах Брэсцкай вобласці) з’яўляецца адной з самых шматлікіх па колькасці кантрактнікаў (70% усіх салдат і сяржантаў служаць на прафесійнай аснове).