Лукашэнка прызначыў новага кіраўніка падсанкцыйнай “Белспецзнештэхнікі”, дырэктараў “Атланта” і БелАЗа
Каталог прадукцыі на сайце "Белспецзнештэхнікі"
11 сакавіка, Позірк. Аляксандр Лукашэнка 11 сакавіка прызначыў Ігара Велянцея генеральным дырэктарам прадпрыемства “Белспецзнештэхніка”, якое ўваходзіць у структуру Дзяржаўнага ваенна-прамысловага камітэта.
Раней Велянцей займаў пасаду намесніка дырэктара па камерцыйных пытаннях Завода дакладнай электрамеханікі, які таксама з’яўляецца прадпрыемствам абароннага комплексу Беларусі.
24 лютага 2022 года “Белспецзнештэхніка” трапіла пад санкцыі ЗША за саўдзел Беларусі ў вайне супраць Украіны.
Паводле інфармацыі прэс-службы Лукашэнкі, ён таксама прызначыў генеральным дырэктарам завода бытавой тэхнікі “Атлант” Дзмітрыя Харытончыка, завода БелАЗ — Сяргея Лесіна.
Акрамя таго, на падставе яго рашэння першым намеснікам старшыні Мінскага аблвыканкама прызначаны Васіль Сысоеў, кіраўніком Карэліцкага райвыканкама (Гродзенская вобласць) — Андрэй Гардзей, Бярэзінскага райвыканкама (Мінская вобласць) — Андрэй Сакалоўскі.
