Беларускі касманаўт будзе пазбаўлены ільгот за “палітычнае” адміністрацыйнае правапарушэнне — указ Лукашэнкі
Марына Васілеўская
22 сакавіка, Позірк. “Дзеянні, якія наносяць шкоду дзяржаўным або грамадскім інтарэсам”, з’яўляюцца падставай для пазбаўлення беларускага касманаўта ільгот і сацыяльных гарантый, гаворыцца ў адпаведным указе Аляксандра Лукашэнкі, падпісаным 19 сакавіка.
Дакумент апублікаваны 22 сакавіка на Нацыянальным прававым інтэрнэт-партале.
Згодна з указам, касманаўт страчвае льготы ў выпадку здзяйснення адміністрацыйных правапарушэнняў, якія кваліфікуюцца як “парушэнне парадку арганізацыі або правядзення масавых мерапрыемстваў” (арт. 24.23 КаАП), “распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць” (арт. 19.11 КаАП), “прапаганда або публічнае дэманстраванне, выраб, распаўсюд нацысцкай сімволікі або атрыбутыкі” (арт. 19.10 КаАП).
Таксама ільготы будуць адмененыя пры здзяйсненні “цяжкага або асабліва цяжкага злачынства” альбо “злачынства экстрэмісцкай накіраванасці”.
Ва ўдакладненні да ўказа адзначаецца, што пад злачынствамі экстрэмісцкай накіраванасці разумеюцца злачынствы, названыя ў частцы 2 заўвагі да арт. 3611 Крымінальнага кодэкса.
У згаданай заўвазе гаворыцца, што гэта “дзеянні, якія адносяцца <…> да экстрэмізму”, а роўна “іншае злачынства, <…> здзейсненае па матывах расавай, нацыянальнай, рэлігійнай варожасці або варажнечы, палітычнай ці ідэалагічнай варожасці альбо па матывах варожасці або варажнечы ў дачыненні да якой-небудзь сацыяльнай групы”.
У адпаведнасці з указам беларускі касманаўт не можа без згоды Лукашэнкі прымаць ад замежных дзяржаў дзяржузнагароды, “ільготы і перавагі ў сувязі з палітычнымі, рэлігійнымі поглядамі або нацыянальнай прыналежнасцю”, карыстацца такімі льготамі.
Пры гэтым касманаўт абавязаны: “ведаць асновы ідэалогіі беларускай дзяржавы”; удзельнічаць у грамадскім жыцці; “годна прадстаўляць” Беларусь на міжнародных і іншых мерапрыемствах; прапагандаваць дасягненні Беларусі ў галіне “пілатуемай касманаўтыкі, пашырэнні і ўмацаванні міжнароднага супрацоўніцтва ў сферы касмічнай дзейнасці”; удзельнічаць у папулярызацыі здаровага ладу жыцця, фізкультуры і спорту; не дапускаць дзеянняў, якія дыскрэдытуюць статус касманаўта.
Да ільгот і сацгарантый, якія прадстаўляюцца касманаўту, згодна з дакументам, адносяцца прадастаўленне ранейшай альбо раўнацэннай пасады да звальнення ў сувязі з удзелам у касмічным палёце; медыцынскае абслугоўванне Рэспубліканскі клінічным цэнтры Упраўлення справамі Лукашэнкі; “пенсійнае забеспячэнне за асаблівыя заслугі перад Рэспублікай Беларусь”, дзяржпадтрымка пры будаўніцтве жылля.
Указ таксама надзяляе касманаўта правам удзельнічаць у якасці “ганаровага госця” ў “грамадска значных мерапрыемствах краіны, прысвечаных дзяржаўным святам, юбілейным датам, грамадска-палітычным падзеям”.
Дзеянне дакумента распаўсюджваецца на грамадзян Беларусі, якія здзейснілі касмічны палёт, а таксама на дублёраў.
Артыкулы 19.11 і 24.23 КаАП з’яўляюцца аднымі з самых распаўсюджаных пры палітычным пераследзе ў Беларусі. “Экстрэмізм” улады трактуюць шырока, актыўна ужываючы гэтае паняцце ў крымінальным парадку ў рэпрэсіўнай практыцы.
Пілатуемы карабель “Саюз МС-25” з беларускай Марынай Васілеўскай на борце павінен быў адправіцца ў экспедыцыю 21 сакавіка, аднак адбылася аўтаматычная адмена пуску і палёт перанеслі.
Першапачаткова палёт з удзелам беларускі быў запланаваны на сакавік 2023 года. Пасля было заяўлена, што з-за ўзніклай няштатнай сітуацыі ён будзе перанесены на восень. Пазней тэрмін перанеслі яшчэ на паўгода. Таксама называўся люты і 13 сакавіка 2024 года.
Бортправадніца авіякампаніі Belavia Васілеўская 6 студзеня ў Мінску па выніках сустрэчы з Лукашэнкам заявіла, што возьме з сабой у палёт сямейную дзіцячую фатаграфію, сцягі Беларусі і Акадэміі навук, а таксама алімпійскі сцяг.
"Саюз МС-25" з беларускай на борце не адправіўся ў палёт — здарылася аўтаматычная адмена пуску (дапоўнена)
Дададзены 3–10 абзацы 21 сакавіка, Позірк. Пілатуемы карабель "Саюз МС-25" з беларускай Марынай Васілеўскай на борце не адправіўся ў экспедыцыю. Як паведамілі ў прамым эфіры з Цэнтра кіравання палётамі (РФ), адбылася аўтаматычная адмена пуску. За пяць хвілін да старту, згодна …