Ціханоўская выступіць на Дэльфійскім эканамічным форуме ў Грэцыі

7 красавіка, Позірк. Святлана Ціханоўская выступіць на IX Дэльфійскім эканамічным форуме, які пройдзе ў Дэльфах (Грэцыя) з 10 па 13 красавіка.

Паводле праграмы мерапрыемства, беларускі дэмакратычны лідар 11 красавіка возьме ўдзел у дыскусіі “Становішча ў свеце” (The State of the World). Мадэратарам будзе нямецкі тэлевядучы Тэдзі Марцін, які працаваў на CNN International і Deutsche Welle, перадаваў рэпартажы з самітаў “Вялікай сямёркі” (G7).

“Святлана Ціханоўская — нацыянальны лідар Беларусі і кіраўнік Аб’яднанага пераходнага кабінета, якая, на думку незалежных назіральнікаў, выйграла на прэзідэнцкіх выбарах 9 жніўня 2020 года ў шматгадовага дыктатара Аляксандра Лукашэнкі. Пасля пачатку расійскага ўварвання ва Украіну 24 лютага 2022 года Ціханоўская перафарматавала кіраўніцтва [дэмакратычнага] руху, стварыўшы і ўзначаліўшы Аб’яднаны пераходны кабінет — цэнтр прыняцця рашэнняў руху. У 2020–2023 гадах Святлана Ціханоўская стала сімвалам мірнай барацьбы за дэмакратыю і моцнае жаночае лідарства”, — гаворыцца на сайце эканамічнага форуму.

Галоўны дарадца Ціханоўскай Франак Вячорка пацвердзіў “Позірку” яе візіт у Грэцыю.

У форуме заяўлены ўдзел прэзідэнтаў Грэцыі Кацярыны Сакеларопулу, Украіны Уладзіміра Зяленскага, Славеніі Наташы Пірц-Мусар, Чарнагорыі Якава Мілатавіча.