Залежнасць Лукашэнкі ад Пуціна можа “цалкам звесці” Беларусь да “васальнай дзяржавы” — Freedom House

11 красавіка, Позірк. Усё большая залежнасць Аляксандра Лукашэнкі ад Уладзіміра Пуціна “як у знешніх, так і ва ўнутраных справах”, нясе ў сабе “рызыку таго, што Беларусь будзе цалкам зведзеная да васальнай дзяржавы”, гаворыцца ў дакладзе “Краіны з пераходнай эканомікай — 2024: падзел рэгіёну на аўтакратыі і дэмакратыі” праваабарончай арганізацыі Freedom House.

Аўтары дакумента называюць Беларусь “закаранелай дыктатурай”, краінай з “кансалідаваным аўтарытарным рэжымам”.

Калі Лукашэнка “сутыкнуўся з грамадзянскім пратэстам супраць вынікаў прэзідэнцкіх выбараў 2020 года”, адзначаюць праваабаронцы, Пуцін “арыентаваў расійскіх сілавікоў і дзяржаўныя СМІ дапамагчы яму захаваць кантроль”.

“Дапамога прынесла Маскве плён у лютым 2022 года, калі беларускі рэжым дазволіў расійскім войскам выкарыстоўваць сваю тэрыторыю ў якасці плацдарма для ўварвання ва Украіну, — гаворыцца ў дакладзе. — З таго часу два дыктатары дапамагалі адзін аднаму вытрымліваць міжнародныя санкцыі і задавальняць патрэбы ваеннага часу”.

Freedom House падкрэслівае, што “аўтакратыі працягваюць узмацняць рэпрэсіі, парушаючы міжнародныя нормы”. Рэжымы “актыўна падтрымлівалі адзін аднаго, ухіляючыся ад санкцый, душачы ўнутраную апазіцыю і зніжаючы адказнасць за ваенную агрэсію і іншыя парушэнні міжнароднага права”.

Такім чынам, аўтакратыі “ствараюць новы рэгіянальны парадак, які больш адпавядае іх інтарэсам”, на што дэмакратычным краінам “яшчэ трэба знайсці адэкватны адказ”.

“Працяглая спроба Масквы знішчыць Украіну і бесчалавечная заваёва Нагорнага Карабаха азербайджанскім рэжымам яшчэ раз прадэманстравалі смяротныя наступствы пашырэння аўтакратыі”, — робяць выснову праваабаронцы.

Паводле апублікаванай 4 сакавіка справаздачы Freedom House “Свабода ў свеце”, у рэйтынгу паводле палітычных правоў Беларусь набрала 2 балы з 40 магчымых, паводле грамадзянскіх свабод — 6 з 60, што робіць яе “найменш свабоднай дзяржавай Еўропы”. У выніковым рэйтынгу Беларусь атрымала 8 балаў, размясціўшыся на адным радку з сектарам Газа, М’янмай, Саудаўскай Аравіяй і Самалі.

Горш, чым у Беларусі, становішча толькі ў Азербайджана (7 балаў), Судана і Афганістана (6), Таджыкістана, ЦАР, Экватарыяльнай Гвінеі (5), КНДР, Эрытрэі (3), Туркменістана (2), Сірыі і Паўднёвага Судана (1).

Freedom House — міжнародная няўрадавая праваабарончая арганізацыя са штаб-кватэрай у Вашынгтоне, якая займаецца вывучэннем распаўсюду свабоды і дэмакратыі ў свеце.