Намеснік кіраўніка МЗС Шастакоў прыбыў у Паўночную Карэю

17 красавіка, Позірк. Намеснік міністра замежных спраў Беларусі Яўген Шастакоў і “асобы, якія яго суправаджаюць”, прыбылі 16 красавіка ў Пхеньян, паведамляе Цэнтральнае тэлеграфнае агенцтва Карэйскай Народна-Дэмакратычнай Рэспублікі (ЦТАК).

Падрабязнасці не прыводзяцца.

Беларускае знешнепалітычнае ведамства візіт не анансавала.

18 студзеня кіраўнік МЗС Сяргей Алейнік абмеркаваў з намеснікам міністра замежных спраў Паўночнай Карэі Кімам Сонгам Жыонгам паглыбленне супрацоўніцтва. Гэта адбылося на палях саміту Руху недалучэння ў Кампале (Уганда).

Дэталі перамоваў не паведамляліся.

Аляксандр Лукашэнка, віншуючы 9 верасня 2023 года кіраўніка Паўночнай Карэі Кім Чэн Ына з Днём утварэння КНДР, заявіў, што “кантакты Мінска і Пхеньяна ў розных галінах працягнуць умацоўвацца, робячы важкі ўнёсак у пабудову больш справядлівага і бесканфліктнага свету, набліжаючы пераход міжнароднай сістэмы да шматпалярнага парадку”.

На перамовах з прэзідэнтам Расіі Уладзімірам Пуціным 15 верасня ў Сочы Лукашэнка выказаў меркаванне, што РФ, Беларусь і КНДР маглі б “падумаць пра супрацу недзе на траіх”.

За апошнія некалькі гадоў дэмакратычныя краіны ўвялі ў дачыненні да Беларусі мноства абмежавальных мер. Санкцыі ўводзіліся за фальсіфікацыю прэзідэнцкіх выбараў у 2020 годзе і жорсткае падаўленне распачатых пасля іх пратэстаў, прымусовую пасадку ў Мінску самалёта Ryanair і наступны арышт апазіцыянераў, якія ляцелі на ім, штучна створаны міграцыйны крызіс на мяжы з краінамі ЕС, дапамогу Расіі ў ваеннай агрэсіі.

У гэтых абставінах рэжым Лукашэнкі пачаў спрабаваць наладжваць палітычныя і эканамічныя сувязі з дзяржавамі Азіі, Афрыкі, Лацінскай Амерыкі, якія ў Мінску называюць “далёкай дугой”.

Доктар эканамічных навук Леў Львоўскі заяўляў “Позірку”, што спробы ўладаў знайсці гандлёвых партнёраў у краінах “далёкай дугі” з’яўляюцца “марнымі” і носяць фактычна “фармальны характар”.