У ЕС інфляцыя істотна ніжэйшая, чым у Беларусі, дзе цэны кантралюе дзяржава

21 красавіка, Позірк. Спажывецкія цэны ў Беларусі растуць значна хутчэй, чым у краінах Еўрапейскага саюзу, сведчаць звесткі Статыстычнай службы ЕС.

У сакавіку гадавая інфляцыя (да сакавіка 2023-га) у Еўрасаюзе склала 2,6% (у лютым 2,8%). Год таму гэты паказчык склаў 8,3%.

У Літве за гэты перыяд цэны выраслі на 0,4% (самы нізкі паказчык у ЕС), Латвіі — 1%, Польшчы — 2,7%.

У Фінляндыі і Даніі інфляцыя ў сакавіку ў гадавым вымярэнні зафіксаваная на ўзроўні 0,6% і 0,8% адпаведна.

Больш за ўсё цэны выраслі ў Румыніі (6,7%), Харватыі (4,9%), Эстоніі і Аўстрыі (па 4,1%).

Паводле звестак Нацыянальнага статыстычнага камітэта, у Беларусі цэны за 12 месяцаў выраслі на 5,6%.

Міжнародны валютны фонд у сваім красавіцкім прагнозе чакае інфляцыю ў Літве ў межах 1,5%, Латвіі — 2%, Польшчы — 5%, Беларусі — 6,3%.

Урад “прыняў пэўныя меры, каб узяць пад кантроль сістэму цэнаўтварэння”, і сёння “ў нейкай ступені” стрымліваць рост цэн удаецца, заявіў Аляксандр Лукашэнка 28 сакавіка на нарадзе аб рабоце банкаўскай сістэмы. Паводле яго слоў, ад практыкі дзяржрэгулявання цэн у Беларусі “не адступяць”.

“Сістэма кантролю за цэнаўтварэннем, за гэтым усім комплексам будзе толькі ўзмацняцца. Такая задача пастаўленая перад урадам. Я прашу мець гэта на ўвазе і Нацыянальнаму банку, і рабіць усё неабходнае, каб людзі менш на нас крыўдзіліся ў сувязі з ростам цэн, інфляцыяй у краіне”, — сказаў Лукашэнка.