Затрымана дачка анкахворага палітвязня Рыгора Кастусёва (дапоўнена)

24 красавіка, Позірк. У Магілёве затрымана Кацярына Кастусёва — дачка палітзняволенага старшыні Партыі БНФ (ліквідаваная ўладамі) Рыгора Кастусёва.

Відэа з ёй апублікавана праўладным тэлеграм-каналам. На ім дзяўчына кажа, што ў 2020 годзе “аказвала садзейнічанне экстрэмісцкаму фарміраванню “Вясна” і ў 2021 годзе зарэгістравалася ў боце плана “Перамога”.

У якім статусе знаходзіцца Кастусёва і ў чым яе абвінавачваюць, не паведамляецца.

4 красавіка стала вядома, што адразу пасля правядзення медыцынскай маніпуляцыі анкахворага палітвязня, 66-гадовага Кастусёва адправілі ў камеру. Палітыку вывелі катэтар з мачавой бурбалкі.

Паводле медыцынскіх крыніц, такую маніпуляцыю вырабляюць для выводзін мачы або для выканання некаторых лячэбных задач. Звычайна яна праводзіцца раз на тры-чатыры тыдні.

15 студзеня суд Івацэвіцкага раёна пастанавіў замяніць Кастусёву рэжым утрымання на турэмны. У лістападзе мінулага года паведамлялася, што мужчына знаходзіцца ў памяшканні камернага тыпу, у чэрвені і ліпені палітыка сама меней чатыры разы адпраўлялі ў штрафны ізалятар на 10 сутак. Яго пазбавілі спатканняў са сваякамі, у яго адабралі асабістыя запісы і кантакты для перапіскі.

Кастусёў знаходзіцца ў няволі з 12 красавіка 2021 года. 5 верасня 2022 года Мінскі абласны суд (суддзя Уладзімір Арэшка) прыгаварыў палітыка да 10 гадоў пазбаўлення волі па ч. 1 арт. 357 КК (змова з мэтай захопу ўлады неканстытуцыйным шляхам) у рамках палітычна матываванай “справы змоўшчыкаў”. Кастусёў віну не прызнаў.

29 лістапада 2022 года Вярхоўны суд адхіліў ягоную скаргу і пакінуў прысуд у сіле.

9 снежня 2022 года МУС унесла палітвязня ў пералік асоб, “датычных да экстрэмісцкай дзейнасці”.

14 жніўня 2023 года Вярхоўны суд ліквідаваў Партыю БНФ. Палітычная структура, пазбаўленая рэгістрацыі ў Беларусі, працягвае існаваць, яе суб’ектнасць прызнаецца на міжнародным узроўні.