Група “Наша справа”, якая балатуецца ў КР, просіць Польшчу не закрывацца ад беларусаў

29 красавіка, Позірк. Збор подпісаў пад зваротам да ўладаў Польшчы з заклікам не закрывацца ад беларусаў распачала група “Наша справа” (лідар — палітолаг Роза Турарбекава), якая балатуецца ў трэці склад Каардынацыйнай рады (КР).

Аб’яднанне падзякавала Варшаве за падтрымку і дапамогу беларусам, стварэнне “спрыяльных умоў” для беларускіх эмігрантаў, але папрасіла “не закрываць межы паміж Польшчай і Беларуссю”.

“Сувязі з Еўропай для нас — адзіная магчымасць захаваць нацыянальную ідэнтычнасць і незалежнасць. Магчымасць свабодна вандраваць, вучыцца, працаваць, весці бізнес у Польшчы і ЕС дапаможа ўмацаванню праеўрапейскіх настрояў і будучым рэформам”, — лічыць група, адзначаючы неабходнасць спрасціць легалізацыю і магчымасць працаўладкавання для грамадзян Беларусі.

На думку групы, санкцыі павінны дзейнічаць супраць тых, хто “нясе адказнасць за рэпрэсіі”. Сёння ж ад закрыцця межаў і візавых абмежаванняў “усё больш церпяць простыя беларусы, а не беларускія ўлады”.

Паводле інфармацыі “Нашай справы” ў Польшчы пражывае больш за 300 тыс. беларускіх грамадзян, з іх 120 тыс. “працуюць і плацяць сацыяльныя ўнёскі”. Акрамя таго, у краіне навучаецца звыш 12 тыс. студэнтаў з Беларусі.

Пасля вынясення палітычна матываванага выраку журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).

“Наша справа” — адна з 12 груп, якія балатуюцца ў Каардынацыйную раду. У яе ўваходзяць 14 чалавек.

Выбары ў КР пачнуцца 25 траўня і працягнуцца 3 дні — да 23:59 27 траўня. Першае пасяджэнне трэцяга склікання чакаецца 15 чэрвеня.