Памежная служба Літвы не ўпусціла ў краіну вагон з Беларусі, пазначаны літарай Z
10 траўня, Позірк. Літоўскія памежнікі адчапілі ад грузавога цягніка, які рухаўся з Беларусі ў Калінінградскую вобласць РФ, вагон, пазначаны літарай Z — сімвалам расійскай агрэсіі ва Украіне.
Як паведаміла Служба аховы дзяржаўнай мяжы Літвы (САДМ), знак Z быў намаляваны на вагоне аэразольнай фарбай.
Ведамства нагадала, што лацінскай літары Z няма ў кірылічным алфавіце, у 2022 годзе гэтая літара была заўважаная на расійскіх танках, якія ўварваліся на ўкраінскую тэрыторыю.
“Нельга адмаўляць, што гэтая літара ўспрымаецца ў Расіі як сімвал падтрымкі вайны і ўварвання ва Украіну”, — гаворыцца ў заяве САДМ.
24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль.
