Ціханоўская: Для Лукашэнкі людзі — расходны матэрыял, які не мае каштоўнасці

21 траўня, Позірк. Міжнародны дзень салідарнасці з беларускімі палітвязнямі “адгукаецца болем у сэрцы кожнага”, заявіла дэмакратычны лідар Святлана Ціханоўская 21 траўня ў відэазвароце, прымеркаваным да гэтай даты.

“Я не магу проста вымавіць слова “палітвязень” — яго хочацца выкрыкваць ад болю і злосці, — сказала палітык. — Боль — бо такіх зняволеных у краіне сёння не менш як паўтары тысячы. Яшчэ амаль столькі ж прайшло праз турмы, катаванні, прыніжэнне і ўжо выйшла на волю, але з падарваным здароўем і страчанымі гадамі жыцця. Злосць жа перапаўняе мяне ад таго, што рэпрэсіі працягваюцца, і людзей бяруць у закладнікі. Праз імкненне забіць свабоду слова, свабоду меркаванняў рэжым пераследуе народ”.

Ціханоўская нагадала, што сёння ў зняволенні “амаль дзве сотні жанчын” — “таму што выступалі за свае правы”; дзясяткі беларусаў не атрымліваюць неабходнай медыцынскай дапамогі, бо “гучна выказалі сваю нязгоду з гвалтам і дыктатам”.

“Максім Знак, Мікалай Статкевіч, Марыя Калеснікава, Віктар Бабарыка, Ігар Лосік і мой муж Сяргей Ціханоўскі знаходзяцца ў рэжыме інкамунікада, — адзначыла яна. — Звестак пра іх стан няма больш за год. Мы стараліся шмат зрабіць, каб змяніць сітуацыю — публічна і непублічна. Але рэжым не мае інтарэсу да вызвалення палітвязняў. Для Лукашэнкі людзі — гэта проста расходны матэрыял, які не мае каштоўнасці. Менавіта таму ўжо шэсць зняволеных памерла за кратамі”.

На думку палітыка, усе, хто знаходзіцца на волі, “абавязаныя штодня шукаць магчымасці, каб вызваліць <…> родных і сяброў з турмаў”. “А пакуль яны ў няволі, мы павінны іх падтрымліваць, і павінен гэта рабіць кожны з нас”, — дадала дэмлідар.

Яна заклікала далучацца да арганізацый і ініцыятыў, якія займаюцца падтрымкай былых і цяперашніх палітвязняў, ахвяраваць у дабрачынныя фонды, праводзіць разам з дыяспарамі акцыі салідарнасці, дапамагаць праваабаронцам дакументаваць факты рэпрэсій і злачынстваў, расказваць пра палітвязняў у сацсетках.

“Мы — голас беларускіх палітвязняў, і нам нельга маўчаць ні дня. Мы можам быць стомленымі і разгубленымі ад таго, што адбываецца навокал. Але людзі, якія знаходзяцца за кратамі, ахвяруюць кожным днём жыцця за свабодную Беларусь. І сёння мы з вамі — іх голас, іх надзея. Мы не маем права падвесці нашых герояў”, — падсумавала Ціханоўская.

Беларускія праваабаронцы абвясцілі 21 траўня Днём салідарнасці з палітвязнямі невыпадкова — у гэты дзень у 2021 годзе ў шклоўскай калоніі № 17 (Магілёўская вобласць) пры загадкавых абставінах памёр актывіст Вітольд Ашурак.

На раніцу 21 траўня ў Беларусі 1.374 чалавекі, якіх праваабарончая супольнасць прызнае палітвязнямі. Рэальная колькасць людзей, якія зазналі рэпрэсіі ў той ці іншай форме, значна большая.