Лаўроў заявіў, што ў ліпені Беларусь уступіць у ШАС

21 траўня, Позірк. Паўнапраўным членам Шанхайскай арганізацыі супрацоўніцтва (ШАС) Беларусь стане ў ліпені, заявіў 21 траўня міністр замежных спраў Расіі Сяргей Лаўроў.

Яго словы па выніках пасяджэння Савета міністраў замежных спраў (СМЗС) краін ШАС у Астане (Казахстан) перадае прэс-служба расійскага знешнепалітычнага ведамства.

Лаўроў удакладніў, што сяброўства Беларусі ў арганізацыі будзе аформленае падчас найбліжэйшага саміту ШАС, які пройдзе 3–4 ліпеня ў Астане.

Паводле слоў кіраўніка расійскай дыпламатыі, Аляксандр Лукашэнка “будзе ўдзельнічаць ва ўсіх мерапрыемствах саміту без якога-небудзь выключэння”.

Кіраўнік МЗС РФ падкрэсліў, што яго беларускі калега Сяргей Алейнік у пасяджэнні СМЗС ШАС удзельнічаў “з самага пачатку”, хоць “пакуль яшчэ на нясталай аснове”.

“У заключэнні дыскусіі ён выступіў, падзякаваўшы ўсім за актыўную падтрымку далучэння Мінска да Шанхайскай арганізацыі супрацоўніцтва”, — сказаў Лаўроў.

12 сакавіка спецпрадстаўнік прэзідэнта Расіі ў справах ШАС Бахціер Хакімаў заяўляў, што Масква “зыходзіць з таго”, што 4 ліпеня колькасць дзяржаў — сябраў Шанхайскай арганізацыі супрацоўніцтва ўзрасце да 10 за кошт Беларусі.

Беларусь інтэгруецца ў ШАС амаль 15 гадоў: у 2010 годзе атрымала статус партнёра арганізацыі, у 2015-м — назіральніка.

У ліпені 2022 года Мінск падаў заяўку на ўступленне ў ШАС. У верасні прэзідэнт Узбекістана Шаўкат Мірзіёеў паведаміў на саміце арганізацыі, што пачалася працэдура надання Беларусі статусу паўнапраўнага сябра.

Пра тое, што Беларусь можа ўступіць у ШАС да наступнага саміту арганізацыі, які пройдзе ў Астане (Казахстан) у ліпені 2024 года, 4 ліпеня 2023-га паведаміў неафіцыйны тэлеграм-канал прэс-службы Лукашэнкі са спасылкай на Алейніка.

Шанхайская арганізацыя супрацоўніцтва створаная ў 2001 годзе. Дэкларацыю аб яе фарміраванні падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.