Прэм’ер Польшчы не выключыў адкрыцця пункта пропуску Баброўнікі на мяжы з Беларуссю

25 траўня, Позірк. Не выключана адкрыццё аднаго з пунктаў пропуску на мяжы Польшчы з Беларуссю, зараз ідзе абмеркаванне па пагранпераходзе Баброўнікі (з іншага боку — Бераставіца), паведамляе RMF24 са спасылкай на польскага прэм’ер-міністра Дональда Туска.

На адкрытай сустрэчы 24 траўня ў Беластоку кіраўнік урада заявіў, што гэта дазволіла б “разблакаваць важную частку польскага малога і сярэдняга бізнесу”.

“Адразу абмоўлюся, я не прыму гэтае рашэнне, калі ў ваеннага і памежнага камандавання будзе адназначна адмоўнае меркаванне, што гэта можа аказаць маштабны негатыўны ўплыў на нашу бяспеку”, — заявіў Туск.

Паводле яго слоў, рашэнне можа быць прынятае на працягу некалькіх дзён. Пры гэтым польскі прэм’ер падкрэсліў, што патэнцыйнае адкрыццё пункта пропуску не павінна быць вытлумачанае як пэўны “жэст у бок беларускага рэжыму”.

Польшча закрыла на нявызначаны тэрмін пагранпераход Баброўнікі 10 лютага 2023 года — неўзабаве пасля вынясення ў Беларусі палітычна матываванага выраку журналісту, актывісту неафіцыйнага Саюза палякаў Анджэю Пачобуту (8 гадоў пазбаўлення волі).

Цяпер на беларуска-польскай мяжы працуе толькі два пункты пропуску: для пасажырскіх перавозак — Брэст (з другога боку — Цярэспаль), для грузавых — Казловічы (Кукурыкі).