Ціханоўская падзякавала экс-прэзідэнту Манголіі за заклік прыцягнуць Лукашэнку да адказнасці

1 ліпеня, Позірк. Падзяку за “рашучы заклік прыцягнуць беларускага дыктатара да адказнасці” выказала былому прэзідэнту Манголіі Цахіягійн Элбэгдоржу дэмакратычны лідар Святлана Ціханоўская.

“[Аляксандр] Лукашэнка павінен прадстаць перад міжнародным трыбуналам. Дзякуй, што вы разам з беларускім народам змагаецеся за справядлівасць!” — напісала палітык на сваёй старонцы ў сацыяльнай сетцы Х.

31 траўня, напярэдадні паездкі Лукашэнкі ў Манголію, Цахіягійн Элбэгдорж адрэагаваў на паведамленне кіраўніка Народнага антыкрызіснага ўпраўлення (НАУ), намесніка кіраўніцы Аб’яднанага пераходнага кабінета (АПК) Паўла Латушкі і заклікаў цяперашнія ўлады дзяржавы арыштаваць візіцёра, які які “здзейсніў злачынствы супраць чалавечнасці”. Гэта, на яго думку, палепшыла б імідж краіны.

Раніцай 1 чэрвеня прэс-служба Лукашэнкі паведаміла, што той вылецеў у Манголію, і прадублявала раней апублікаваную праграму візіту, які працягнецца да 4 чэрвеня. Згодна з ёй, ва Улан-Батары пройдуць перагаворы з прэзідэнтам Ухнаагійн Хурэлсухам, на якіх плануецца абмеркаваць “перспектыўныя кірункі супрацы для максімальна поўнага раскрыцця патэнцыялу беларуска-мангольскіх стасункаў”. Заяўлена, што гаворка пойдзе пра “магчымасці пашырэння ўзаемадзеяння ў гандлёва-эканамічнай сферы, пастаўкі на мангольскі рынак запатрабаванай харчовай і прамысловай прадукцыі айчынных прадпрыемстваў, сумесную працу па лініі аграпрамысловага комплексу”.

У дні візіту Лукашэнкі адбудзецца двухбаковы бізнес-форум, на якім “прадстаўнікі дзелавых колаў з абодвух бакоў змогуць больш дэталёва азнаёміцца з магчымасцямі адзін аднаго, абмеркаваць практычныя пытанні па канкрэтных напрамках”.

31 траўня ва Улан-Батары адбыліся перагаворы міністра замежных спраў Беларусі Сяргея Алейніка з мангольскай калегай Батмунхійн Батцэцэг. Паводле інфармацыі МЗС, бакі “абмеркавалі стан і перспектывы палітычнага дыялогу, гандлёва-эканамічнага супрацоўніцтва і гуманітарнага ўзаемадзеяння”.

На фоне таго, што адбываецца, Латушка выступіў з заявай, у якой адзначыў, што паездка Лукашэнкі ў Манголію — не выпадковасць і не проста двухбаковы візіт, а “дзёрзкае і зневажальнае пасланне ўсёй міжнароднай супольнасці і сістэме міжнароднага правасуддзя”.

Цахіягійн Элбэгдорж, які ўзначальваў Манголію ў 2009–2017 гадах, у лістападзе 2022-га ўдзельнічаў у панэльнай дыскусіі Сусветнага форуму за дэмакратыю ў Страсбургу разам з Ціханоўскай.