Памежная служба Польшчы паведаміла пра раненне чарговага супрацоўніка на мяжы з Беларуссю

4 чэрвеня, Позірк. Яшчэ адзін супрацоўнік Памежнай аховы Польшчы атрымаў раненне на мяжы з Беларуссю, паведамляе прэс-служба ведамства.

Інцыдэнт здарыўся 3 чэрвеня ў раёне Белавежскай пушчы. Заяўлена, што “група агрэсіўна настроеных людзей” ударыла яго па галаве галінай дрэва. Памежнік шпіталізаваны, пагрозы яго жыццю няма.

Пра напады замежнікаў, якія спрабавалі нелегальна трапіць у Еўрасаюз з беларускай тэрыторыі, на польскіх вайскоўцаў і памежнікаў паведамлялася таксама 28 і 31 траўня.

29 траўня прэм’ер-міністр Польшчы Дональд Туск наведаў размяшчэнне памежнікаў у вёсцы Дубічэ-Царкеўнэ (ля Белавежскай пушчы) і заявіў пра планы аднавіць 200-метровую буферную зону каля мяжы з Беларуссю.

1 чэрвеня віцэ-прэм’ер Польшчы — міністр нацыянальнай абароны Уладзіслаў Касіняк-Камыш паведаміў, што буферная зона на мяжы з Беларуссю павінна быць адноўленая 4 чэрвеня. Разам з тым 3 чэрвеня кіраўнік Міністэрства ўнутраных спраў і адміністрацыі Томаш Семаняк паведаміў, што вяртанне буфернай зоны будзе перанесенае на пазнейшы тэрмін.

4 чэрвеня намеснік міністра нацыянальнай абароны гэтай краіны Цэзары Томчык заявіў, што ў сувязі з узрослым ціскам на мяжу з боку Беларусі Польшча на гэтым тыдні правядзе кансультацыі пра вяртанне буфернай зоны, пасля чаго будзе прынятае тое ці іншае рашэнне.