Амбасадар РФ анансаваў адкрыццё сёлета чыгуначных маршрутаў з Смаленска ў Оршу і Віцебск
Смаленскі вакзал
10 чэрвеня, Позірк. Адкрыццё новых чыгуначных напрамкаў паміж Расіяй і Беларуссю ў 2024 годзе анансаваў 9 чэрвеня ў Мінску амбасадар РФ Барыс Грызлоў.
“Нашы краіны рэалізуюць шэраг перспектыўных праектаў, многія з якіх звязаныя з транспартам і лагістыкай, — цытуе дыпламата сайт расійскай амбасады. — На днях быў запушчаны цягнік паміж Псковам і Беларуссю. Цяпер мы працуем над тым, каб наладзіць чыгуначныя зносіны Смаленск — Орша і Смаленск — Віцебск. Гэта таксама будзе рэалізавана сёлета”.
“Яшчэ адзін цікавы праект — высакахуткасная чыгуначная магістраль Масква — Мінск. Цягнік будзе дасягаць сталіц краін на працягу прыкладна трох гадзін. Гэты перспектыўны напрамак таксама будзе рэалізаваны”, — сцвярджае ён.
Паводле слоў Грызлова, расійска-беларускія стасункі “развіваюцца пад лозунгам “Дзве краіны — адна эканоміка”, што пацвярджаецца лічбамі тавараабароту”: “Ён расце, прычым не на адзінкі, а на дзясяткі адсоткаў — і ў 2022, і ў 2023 гадах”.
“Мы ўжо можам казаць і пра 2024-ы: тавараабарот павялічыўся амаль на 20% за першыя тры месяцы. Гэта вельмі высокі паказчык. Расце і экспарт з Беларусі ў Расію. Гэта вельмі важна, бо пасля ўвядзення Захадам санкцый назіралася сур’ёзная страта экспартных кантрактаў. Усё гэта было паспяхова кампенсавана. Створаны транзітныя калідоры праз Расію на Усход. Так што мы з упэўненасцю глядзім у будучыню”, — заявіў дыпламат.
Грызлоў размаўляў з журналістамі ў Палацы Рэспублікі перад пачаткам канцэрта, прымеркаванага да Дня Расіі (адзначаецца 12 чэрвеня). На падставе таго, што на мерапрыемства, на яго думку, “прыйшло шмат гасцей”, амбасадар зрабіў выснову, што “беларусы любяць Расію”, а стасункі паміж “народамі і краінамі — сапраўды брацкія”.
У Мінску выступіў дзіцячы ансамбль з "лнр"
9 чэрвеня, Позірк. У Мінску 9 чэрвеня выступіў "дзіцячы ансамбль "Алегра" з так званай "луганскай народнай рэспублікі", вынікае з паведамлення амбасады Расіі ў Беларусі. Калектыў прыняў удзел у канцэрце, прысвечаным Дню Расіі (нацыянальнае свята, адзначаецца 12 чэрвеня — у дзень …