Алейнік возьме ўдзел у пасяджэнні кіраўнікоў МЗС краін БРІКС+ у Ніжнім Ноўгарадзе

10 чэрвеня, Позірк. У першым пасля пашырэння БРІКС пасяджэнні кіраўнікоў знешнепалітычных ведамстваў краін-членаў, якое пройдзе 10–11 чэрвеня ў Ніжнім Ноўгарадзе (РФ), Беларусь возьме ўдзел у якасці дружалюбнай арганізацыі дзяржавы.

Беларуская дэлегацыя на чале з міністрам замежных спраў Сяргеем Алейнікам ужо прыбыла ў згаданы расійскі горад, паведамляе неафіцыйны тэлеграм-канал МЗС.

“Для нас асабліва важна, што падчас цяперашняга пасяджэння асаблівая ўвага будзе нададзеная выпрацоўцы мадальнасцей новай катэгорыі дзяржаў — партнёраў аб’яднання ў рамках падрыхтоўкі да саміту ў Казані ў кастрычніку. Ну, а глабальна, БРІКС ужо сур’ёзна апярэджвае “Вялікую сямёрку”, — гаворыцца ў паведамленні.

Падкрэслена, што ў Ніжнім Ноўгарадзе “краіны-аднадумцы будуць разам шукаць адказы на агульныя выклікі, якія стаяць перад міжнароднай супольнасцю ў мэтах забеспячэння роўнай бяспекі, устойлівага развіцця і доўгатэрміновага эканамічнага росту”.

Раней МЗС адзначала, што ў краінах — удзельніцах БРІКС пражывае больш за 40% насельніцтва планеты, дзяржавы, якія ўваходзяць у аб’яднанне, “забяспечваюць звыш 30% сусветнага ВУП”.

Улетку 2006 года Бразілія, Расія, Індыя і Кітай пачалі працэс фармавання БРІК — садружнасці дзяржаў, заснаванай на прынцыпах эканамічнай супрацы. Першы саміт БРІК, які азнаменаваў стварэнне аб’яднання, адбыўся ў чэрвені 2009 года.

У 2011-м садружнасць БРІК была перайменаваная ў БРІКС, паколькі да яе далучылася Паўднёва-Афрыканская Рэспубліка (Republic of South Africa).

Ад пачатку 2024 года арганізацыя ператварылася ў БРІКС+, паколькі да яе афіцыйна далучыліся Іран, Саудаўская Аравія, Егіпет, Эфіопія і ААЭ. Аргентына, якая атрымала афіцыйнае запрашэнне, адмовілася ад уступлення пасля прыходу да ўлады ў снежні 2023 года прэзідэнта Хаўера Мілея.

Беларусь падала заяўку на ўступленне ў арганізацыю летась.

У 2020-х заяўкі на ўступленне ў БРІКС падалі Алжыр, Бангладэш, Бахрэйн, Інданезія. Цікавасць да патэнцыйнага далучэння праявілі Ангола, Афганістан, Венесуэла, Габон, Гвінея-Бісаў, Гандурас, Дэмакратычная Рэспубліка Конга, Зімбабвэ, Казахстан, Каморы, Куба, Мексіка, Нігерыя, Нікарагуа, Пакістан, Сенегал, Сірыя, Судан, Тайланд, Туніс, Турцыя, Уганда і Уругвай.