10 чэрвеня, Позірк. Спецыяльная вытворчасць распачатая 7 чэрвеня ў дачыненні да 43-гадовага Генадзя Капітанава, сведчыць абноўлены пералік на сайце Следчага камітэта.
Як высветліў “Позірк”, мужчына — атэставаны інструктар па краў-мага (распрацаваная ў Ізраілі ваенная сістэма рукапашнага бою) са стажам заняткаў больш за 10 гадоў. Капітанаў быў адным з двух беларускіх спартсменаў, якія ўдзельнічалі ў першым афіцыйным чэмпіянаце свету па спартыўным кірунку адзінаборства ў 2017 годзе ў Ізраілі, а таксама суддзёй першых спаборніцтваў па краў-мага ў Мінску ў 2019 годзе.
Капітанаў з’яўляецца фігурантам справы паводле шэрагу артыкулаў Крымінальнага кодэкса, якія ўлады апошнім часам ужываюць для пераследу з палітычных матываў, у тым ліку для завочных судоў: ч. 1 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 3 арт. 361 (заклікі да захадаў абмежавальнага характару (санкцый), іншых дзеянняў, накіраваных на прычыненне шкоды нацбяспецы), ч. 1 арт. 368 (абраза прэзідэнта) і арт. 369 (абраза прадстаўніка ўлады).
Абвінавачанаму прапанавана з’явіцца ва ўпраўленне Следчага камітэта па Мінску.
