Ціханоўская абмеркавала з дарадцам Байдэна неабходнасць усебаковай падтрымкі Беларусі

12 чэрвеня, Позірк. Неабходнасць усебаковай падтрымкі Беларусі і Украіны абмеркавала з дарадцам прэзідэнта ЗША па нацыянальнай бяспецы Джэйкам Саліванам дэмакратычны лідар Святлана Ціханоўская.

Сустрэча прайшла 12 чэрвеня ў Белым доме, паведаміла прэс-служба беларускага палітыка. 

Адзначаецца, што падчас перамоваў Ціханоўская “распавяла пра беларускіх добраахвотнікаў і валанцёраў ва Украіне” і “падкрэсліла важнасць перамогі Украіны для перамен у Беларусі”. Дэмлідар таксама ўзняла пытанне ваенна-палітычнай сітуацыі ў Беларусі, “падсвяціўшы мізэрную падтрымку грамадствам уступу ў вайну і ўніфікацыі з Расіяй”.

Гаворачы пра ўзмацненне ціску на рэжым Лукашэнкі, Ціханоўская адзначыла, што санкцыі “не павінны мець шчылін і мусяць быць скіраваныя на вызваленне палітвязняў, супраць рэжыму і яго дапамогі Расіі ў вайне”.

Паведамляецца, што Ціханоўская “падкрэсліла важнасць выдачы віз” і “дапамогі беларускай грамадзянскай супольнасці за мяжой”, нагадаўшы пра неабходнасць ізаляцыі рэжыму, а не людзей, бо “беларусам і беларускам трэба заставацца мабільнымі”. 

12 чэрвеня Ціханоўская сустрэлася таксама з экс-спікерам Палаты прадстаўнікоў ЗША Нэнсі Пэлосі і амерыканскімі сенатарамі Джын Шагін, Дзікам Дурбінам, Пітэрам Уэлчам.

Падчас сустрэчы, паведамляе прэс-служба, палітык “адзначыла неабходнасць амерыканскага лідарства ў супрацьстаянні дыктатарам”, нагадала пра важнасць падтрымкі беларускай дэмакратычнай супольнасці, а таксама ціску на рэжым з мэтай вызвалення палітвязняў і спынення ўдзелу Беларусі ў вайне. 

Дэмлідар пазнаёміла амерыканскіх палітыкаў з вынікамі выбараў у Каардынацыйную раду і планамі дэмсіл на 2025 год. Бакі абмеркавалі праект новага Акту аб дэмакратыі ў Беларусі, кампанію ў падтрымку беларускіх палітвязняў, а таксама “пытанне санкцый, працяг і павелічэнне падтрымкі незалежных медыя, рэпрэсаваных, культурніцкіх і праваабарончых ініцыятыў, мерапрыемствы па Беларусі падчас саміту НАТО і падтрымку беларусаў у ЗША”.

Ціханоўская зноў заклікала амерыканскі бок “раздзяляць беларускі народ і рэжым” і не дапусціць, каб Беларусь “стала суцяшальным прызам для Пуціна”.

Ціханоўская знаходзіцца з візітам у ЗША 11–13 чэрвеня.