14 чэрвеня, Позірк. “Найбліжэйшым часам адбудзецца некалькі ключавых падзей, на якіх будуць абмяркоўваць у тым ліку і Беларусь”, — заявіла беларускі дэмакратычны лідар Святлана Ціханоўская па выніках візіту ў ЗША і перамоў у Белым доме.
Паводле яе слоў, беларуская праблематыка будзе ўзнятая на саміце “Вялікай сямёркі” ў Італіі (пачаўся 13 чэрвеня), мірнай канферэнцыі па Украіне (15–16 чэрвеня, Швейцарыя), саміце НАТО (9–11 ліпеня, ЗША), будучай сесіі Генеральнай асамблеі ААН.
“І якія б рашэнні не былі прынятыя [на гэтых форумах], вельмі важна, каб беларускае пытанне не адкладалі на потым”, — падкрэсліла дэмлідар.
Для амерыканскіх уладаў, паводле сцвярджэння Ціханоўскай, будуць прыярытэтнымі ўзнятыя ёю на сустрэчах у Вашынгтоне пытанні па падтрымцы сем’яў беларускіх рэпрэсаваных, вызваленні палітвязняў (у тым ліку з “гуманітарнага спісу”, чый стан патрабуе неадкладнага вызвалення), рэжыму “інкамунікада” — інфармацыйнай ізаляцыі вязняў, якую палітык назвала асобным відам катаванняў.
Візіт Ціханоўскай у ЗША адбыўся 11–13 чэрвеня.
