У мінскім парадзе 3 ліпеня возьмуць удзел вайскоўцы васьмі краін, у тым ліку Расіі і Кітая

14 чэрвеня, Позірк. У парадзе, які пройдзе ў Мінску 3 ліпеня з нагоды дзяржсвята Дня незалежнасці, возьмуць удзел вайскоўцы Беларусі, Расіі, Азербайджана, Казахстана, Кыргызстана, Узбекістана, Таджыкістана і Кітая, паведамляе прэс-служба Міністэрства абароны.

Ведамства адзначае, што прадстаўнікі 21 дзяржавы пацвердзілі ўдзел у святкаванні Дня незалежнасці Беларусі.

Як паведамлялася, чарговая партыя вайсковай тэхнікі з Расіі прыбыла ў Беларусь для ўдзелу ў парадзе 3 ліпеня. У складзе эшалона гаўбіцы “Мста-Б” і мінамётныя комплексы 2С12 “Сані”. Таксама з Масквы для ўдзелу ў парадзе дастаўлена 10 танкаў Т-34 40-х гадоў мінулага стагоддзя.

Мінабароны паведамляла, што ў парадзе ўпершыню будуць задзейнічаныя аператыўна-тактычныя комплексы “Іскандэр-М”, а таксама больш за 250 адзінак колавай і гусенічнай тэхнікі.

15 траўня прэс-служба Мінабароны са спасылкай на намесніка кіраўніка ведамства Андрэя Жука паведамляла, што ўсяго ў парадзе 3 ліпеня возьмуць удзел больш за 6 тыс. вайскоўцаў і блізу 250 адзінак баявой тэхнікі і авіяцыя.

Акрамя Мінабароны ў парадзе прымуць удзел разлікі Міністэрства ўнутраных спраў, Міністэрства па надзвычайных сітуацыях, Дзяржаўнага пагранічнага камітэта, Следчага камітэта, кадэцкія вучылішчы і спецыялізаваныя ліцэі.

Парад завершыцца пляц-канцэртам зводнай роты ганаровай варты і выступленнем вайсковага аркестра.

У 1991–1996 гадах Дзень незалежнасці Беларусі быў прымеркаваны да даты прыняцця Дэкларацыі аб дзяржаўным суверэнітэце — 27 ліпеня. У выніку ініцыяванага Аляксандрам Лукашэнкам рэферэндуму галоўнае дзяржаўнае свята было перанесенае на 3 ліпеня — Дзень вызвалення Мінска ад гітлераўскай акупацыі ў 1944 годзе. Сёлета-80-я гадавіна вызвалення.