У пошуках нелегальных мігрантаў МУС праверыла ў Мінску рынкі, інтэрнаты і “прыватныя адрасы”

14 чэрвеня, Позірк. Галоўнае ўпраўленне ўнутраных спраў Мінгарвыканкама паведаміла аб правядзенні 3–9 чэрвеня першага этапу аперацыі “Нелегал — 2024”.

Адзначаецца, што мэтай аперацыі з’яўляецца “супрацьдзеянне незаконнай міграцыі, узмацненне кантролю за ўездам, знаходжаннем і перамяшчэннем замежных грамадзян і асоб без грамадзянства, прафілактыка правапарушэнняў як з боку апошніх, так і ў дачыненні да іх”.

“Супрацоўнікамі службаў і падраздзяленняў мінскага гарнізона праводзілася комплексная адпрацоўка рынкавых комплексаў, інтэрнатаў, прыватных адрасоў, па якіх незаконна пражывалі замежныя грамадзяне, і іншых месцаў магчымага з’яўлення замежнікаў, якія знаходзяцца на тэрыторыі сталіцы без прававых падстаў”, — гаворыцца ў паведамленні.

Па выніках аперацыі “замежныя грамадзяне прыцягнутыя да адміністрацыйнай адказнасці, да злосных парушальнікаў ужытыя меры па выправаджэнні з рэспублікі”, заявілі ў мінскім ГУУС.

12 чэрвеня МУС паведаміла, што пры падтрымцы АМАПу затрыманыя 54 незаконныя мігранты ў аграгарадку Калодзішчы (Мінскі раён).

27 траўня пракуратура Першамайскага раёна Мінска накіравала ў суд крымінальную справу паводле абвінавачвання двух замежных грамадзян у арганізацыі незаконнай міграцыі паводле ч. 2 арт. 371¹ Крымінальнага кодэкса. Грамадзянства і краіна паходжання абвінавачаных не называюцца.

9 красавіка начальнік упраўлення грамадзянства і міграцыі УУС Мінаблвыканкама Юрый Бразінскі паведаміў, што ў аграгарадку Калодзішчы і вёсцы Вялікае Сціклева (Мінскі раён) супрацоўнікі міліцыі затрымалі дзве групы нелегальных мігрантаў з Афганістана, Емена і Сірыі.

6 чэрвеня памёр 21-гадовы шэраговец 1-й Варшаўскай танкавай брыгады Матэвуш Сітэк. Раніцай 28 траўня Памежная ахова Польшчы паведаміла, што польскі салдат падвергнуўся нападу мігранта, які спрабаваў у складзе вялікай групы незаконна перасекчы мяжу з боку Беларусі. Адзначалася, што іншаземец ударыў яго нажом.

6 чэрвеня паверанаму ў справах Беларусі Аляксею Панкраценку была ўручаная нота пратэсту з “рашучым патрабаваннем спыніць правакацыі на мяжы і арганізацыю міграцыйных плыняў”. Дыпламат быў выкліканы ў МЗС Польшчы ў сувязі са смерцю Сітэка. Варшава запатрабавала ад Мінска “ўстанавіць асобу і выдаць падазраванага ў забойстве польскага грамадзяніна”.

За апошні час на польскіх вайскоўцаў на ўсходняй мяжы было здзейснена 50 нападаў, заявіў прэзідэнт Польшчы Анджэй Дуда на пасяджэнні Рады нацыянальнай бяспекі 10 чэрвеня ў Беластоку.

Дэмакратычныя сілы Беларусі ўсклалі адказнасць за гібель вайскоўца і атакі на мяжы на рэжым Лукашэнкі.

27 кастрычніка 2023 года, каментуючы патокі нелегальнай міграцыі з Беларусі ў краіны Еўрасаюза, Аляксандр Лукашэнка заявіў: “Мы не адстойнік, мы нікога тут лавіць не будзем. Тым больш вы (краіны Захаду. — “Позірк“.) іх паклікалі. Хай ідуць”.

Міграцыйны крызіс на мяжы Беларусі з краінамі ЕС працягваецца з вясны 2021 года.