На пасяджэнні Савета бяспекі Лукашэнка ў чарговы раз заявіў, што Беларусь нікому ніколі не пагражала

18 чэрвеня, Позірк. Праект дакумента, звязанага з пытаннямі ацэнкі стану нацыянальнай бяспекі, разглядаўся 18 чэрвеня ў Мінску на пасяджэнні Савета бяспекі, сабраным Аляксандрам Лукашэнкам.

Паводле інфармацыі яго прэс-службы, пасяджэнне праводзілася ў развіццё прынятай на Усебеларускім народным сходзе новай Канцэпцыі нацыянальнай бяспекі.

“Канцэпцыя зацверджаная. Нашы нацыянальныя стратэгічныя інтарэсы, пагрозы, прыярытэтныя напрамкі іх нейтралізацыі, агульнае бачанне далейшага развіцця ў сферы бяспекі вызначаныя, — сказаў Лукашэнка. — Тут усё вельмі ясна. Рэспубліка Беларусь — мірная краіна, заўсёды адкрытая для раўнапраўнага дыялогу і ўзаемавыгаднага супрацоўніцтва. Мы нікому ніколі не пагражалі. Больш за тое, адкрыта (у адрозненне ад іншых краін) даводзім нашыя падыходы ўсім. Хто хоча гэта чуць, той пачуе”.

Паводле яго слоў, замацаваць асобныя палажэнні згаданай канцэпцыі ў дакументах недастаткова: “Неспеў час укараніць гэтыя падыходы ў практыку”.

“Гэта значыць, мы павінны мець дакладнае ўяўленне пра тое, што рэальна адбываецца ўнутры краіны і вакол яе. Ваенная бяспека, эканоміка, сацыяльная, палітычная сферы і іншыя. Без прыкрас, максімальна выверана і аб’ектыўна”, — сказаў ён.

Пасля расійскага ўварвання ва Украіну, падтрыманага афіцыйным Мінскам, прадстаўнікі дзейных уладаў неаднаразова сцвярджалі, што краіны Захаду выношваюць планы па агрэсіі ў дачыненні да Беларусі. Ніякіх доказаў ані разу прадстаўлена не было, што не перашкодзіла Лукашэнку, высокапастаўленым чыноўнікам, прапагандзе пагражаць суседнім краінам “дзеяннямі ў адказ” ваеннага характару, у тым ліку з дапамогай расійскай тактычнай ядзернай зброі.