Палітзняволеную Шарэнда-Панасюк накіравалі на чарговую псіхіятрычную экспертызу

27 чэрвеня, Позірк. Паліна Шарэнда-Панасюк на патрабаванне следчага павінна прайсці псіхолага-псіхіятрычную экспертызу, паведаміў праваабарончы партал “Берасцейская Вясна” са спасылкай на мужа палітзняволенай Андрэя Шарэнду.

Паводле яго слоў, жанчына лічыць сябе “не зняволенай, а закладніцай, тэрмін за кратамі якой можа працягвацца бясконца”.

Цяпер Шарэнда-Панасюк знаходзіцца ў гомельскім СІЗА, дзе па законе ўтрыманне “павінна быць больш свабодным, чым у калоніі”.

“Але катаванні працягваюцца. Сувязі з сям’ёй няма. Ні ў траўні, ні ў чэрвені перадачу ад родных не ўзялі праз правакацыі супрацоўнікаў СІЗА. Так, у траўні і чэрвені нібыта хтосьці прынёс па 30 кілаграмаў морквы сумнеўнай якасці. Такім чынам быў вычарпаны ліміт на перадачы. Пасылкі можна адпраўляць, але ў спякоту мала што карыснага з ежы можна пакласці”, — сказаў Шарэнда.

Ён адзначыў, што “паводле ўскосных даных”, выгляд у жонкі “як у нездаровага чалавека”: “Яна вельмі просіць сям’ю, сяброў, праваабарончыя арганізацыі дапамагчы ў яе вызваленні. Сама кажа, што прыкладала ўсе намаганні для свайго вызвалення: выконвала ўсе патрабаванні да палітвязняў, не парушала правілаў калоніі”.

Гаворачы аб псіхолага-псіхіятрычнай экспертызе, Шарэнда падкрэсліў, што “для Паліны яна будзе ўжо чацвёртай”.

Паводле яго слоў, ранейшыя экспертызы паказалі, што “яна абсалютна здаровы чалавек у псіхіятрычным плане, пра што ёсць даведка з Рэспубліканскага цэнтра псіхічнага здароўя “Навінкі”.

21 траўня стала вядома, што на Шарэнда-Панасюк завялі трэцюю крымінальную справу.

Паведамлялася, што яе зноў абвінавацілі паводле арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы, які выконвае пакаранне ў выглядзе пазбаўлення волі).

Раней праваабаронцы паведамлялі, што запланаваны тэрмін вызвалення Шарэнда-Панасюк — 21 траўня.

Паводле звестак праваабарончай ініцыятывы Dissidentby, 2 траўня суд Рэчыцкага раёна (Гомельская вобласць) устанавіў за палітзняволенай прэвентыўны нагляд. Гэтая мера прадугледжвае назіранне органаў унутраных спраў за тым, як вызваленая з месцаў пазбаўлення волі асоба выконвае часовыя абмежаванні і выконвае ўскладзеныя на яе абавязкі.

22 сакавіка стала вядома, што жанчына звярнулася з прашэннем аб памілаванні да Аляксандра Лукашэнкі. Пра гэта яна паведаміла ў інтэрв’ю дзяржтэлеканалу “Беларусь 1”.

У чэрвені 2021 года суд Маскоўскага раёна Брэста прыгаварыў Шарэнда-Панасюк да двух гадоў пазбаўлення волі ва ўмовах агульнага рэжыму паводле арт. 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта) КК.

У красавіку 2022 года палітзняволеную прыгаварылі яшчэ да аднаго года пазбаўлення волі паводле ч. 1 арт. 411 КК, у кастрычніку 2023-га — яшчэ да аднаго года паводле таго ж артыкула.

21 сакавіка Камітэт ААН па ліквідацыі дыскрымінацыі жанчын заклікаў беларускія ўлады прыняць тэрміновыя меры для абароны Шарэнда-Панасюк. Гэта першы падобны выпадак па справах супраць Беларусі.

Раней муж, які знаходзіцца з дзецьмі ў эміграцыі, паведамляў, што Шарэнда-Панасюк “мінімум 32 разы змяшчалася ў нечалавечыя ўмовы” штрафнога ізалятара і карцара, а яшчэ “каля 150 дзён” правяла ў памяшканні камернага тыпу.