Праваабаронца Судаленка звярнуўся да прэзідэнта Францыі з просьбай садзейнічаць вызваленню Бяляцкага

3 ліпеня, Позірк. З просьбай “уступіць у дыялог з недэмакратычным рэжымам Беларусі” па пытанні вызвалення лаўрэата Нобелеўскай прэміі міру Алеся Бяляцкага звярнуўся праваабаронца цэнтра “Вясна”, былы палітвязень Леанід Судаленка да прэзідэнта Францыі Эманюэля Макрона.

У лісце, які прыводзіць “Радыё Свабода”, ён нагадаў пра лёс заснавальніка ПЦ “Вясна” Алеся Бяляцкага і іншых беларускіх палітвязняў і параўнаў яго з лёсамі пяці ўкраінцаў, якім удалося вызваліцца з беларускіх турмаў дзякуючы перамовам прэзідэнта Украіны Уладзіміра Зяленскага.

2 ліпеня “Радыё Свабода” паведаміла, што Бяляцкі пазбаўлены перадач.

Паводле крыніцы выдання, у красавіку або траўні Бяляцкага вярнулі з памяшкання камернага тыпу (ПКТ) горацкай калоніі № 9 (Магілёўская вобласць) у атрад. У ПКТ ён утрымліваўся з пачатку лістапада 2023 года, працуе на дрэваапрацоўцы.

Адзначаецца, што Бяляцкі не атрымлівае карэспандэнцыю ад сваякоў і сяброў, не мае магчымасці стэлефаноўвацца са сваякамі па відэасувязі. Зрэдку на волю ад яго даходзяць лісты і паштоўкі. Актуальнай інфармацыі пра стан здароўя Бяляцкага няма.

3 сакавіка 2023 года ў рамках палітычна матываванай справы Бяляцкі быў асуджаны на 10 гадоў пазбаўлення волі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч — на 9, каардынатар кампаніі “Праваабаронцы за свабодныя выбары” Уладзімір Лабковіч — на 7. Праваабаронца Зміцер Салаўёў, які знаходзіцца за мяжой, завочна асуджаны па гэтай справе на 8 гадоў зняволення.

Летась 21 снежня Міжнародная юрыдычная група, якая займаецца сітуацыяй з Бяляцкім, падала петыцыю ў працоўную групу ААН па адвольных затрыманнях. На думку юрыстаў, праваабаронцу пратрымалі “без якіх-небудзь юрыдычных падстаў” 17 месяцаў, перш чым ён паўстаў перад судом. Акрамя таго, судовы працэс “быў азмрочаны абуральнымі парушэннямі належнай прававой працэдуры”.

Адзначалася таксама, што “з моманту арышту ў ліпені 2021 года Бяляцкі мае вельмі абмежаваныя зносіны са сваёй сям’ёй, адвакатам і навакольным светам”.

У 2022 годзе Бяляцкі стаў лаўрэатам Нобелеўскай прэміі міру. 10 снежня ў Осла прэмія была ўручана яго жонцы. На цырымоніі таксама прысутнічала дэмакратычны лідар Святлана Ціханоўская.

Паводле рашэння Нобелеўскага камітэта прэмія была падзелена паміж праваабаронцамі: Бяляцкім, Украінскім цэнтрам грамадзянскіх свабод і расійскім таварыствам “Мемарыял”.

2 ліпеня Лукашэнка анансаваў вызваленне сваіх “вельмі цяжкахворых” апанентаў.