МЗС КНР: Сумесныя кітайска-беларускія ваенныя манёўры не накіраваныя супраць трэціх краін

11 ліпеня, Позірк. Сумесныя кітайска-беларускія ваенныя манёўры не накіраваныя супраць якой бы там ні было трэцяй краіны, заявіў 11 ліпеня афіцыйны прадстаўнік Міністэрства замежных спраў КНР Лін Цзянь.

Паводле яго слоў, якія перадае агенцтва PAP, супрацоўніцтва паміж Кітаем і Беларуссю, у тым ліку ў сферы бяспекі, “не павінна быць накіравана супраць інтарэсаў трэцяга боку і не павінна падрываць рэгіянальны мір і стабільнасць”.

Лінь Цзянь таксама паўтарыў тэзіс Пекіна адносна польска-беларускіх адносін, якія абвастрыліся, выказаўшы надзею, што Варшава і Мінск “вырашаць свае рознагалоссі шляхам дыялогу і кансультацый на аснове ўзаемнай павагі”.

6 ліпеня паведамлялася аб прыбыцці Беларусь кітайскіх вайскоўцаў для ўдзелу ў сумеснай трэніроўцы з падраздзяленнямі Узброеных сіл Беларусі. Манёўры праходзяць 8–19 ліпеня пад Брэстам паблізу мяжы з Польшчай у рамках “гадавога плана і кітайска-беларускіх дамоўленасцяў”.

Мінабароны Беларусі сцвярджае, што трэніроўка дазволіць бакам “абмяняцца вопытам, правесці зладжванне беларускіх і кітайскіх падраздзяленняў, стварыць падмурак для далейшага развіцця беларуска-кітайскіх адносін у сферы сумеснай падрыхтоўкі войскаў”.

У рамках сумеснай трэніроўкі вайскоўцы Беларусі і Кітая 9 ліпеня правялі заняткі па паветрана-дэсантнай падрыхтоўцы “Атакуючы сокал”, адпрацаваўшы наземныя элементы скачка з парашутам.

10 ліпеня ў рамках трэніроўкі на палігоне праведзена “дэсантаванне беларускіх і кітайскіх вайскоўцаў”, паведаміла прэс-служба Мінабароны.

Аляксандр Лукашэнка на сустрэчы з міністрам абароны КНР Лі Шанфу 17 жніўня 2023 года заявіў, што ваеннае супрацоўніцтва дзвюх краін “ні ў якім разе не будзе накіравана супраць трэціх краін”. “Нам гэта не трэба, нам трэба засцерагчы свае дзяржавы і свае народы”, — сказаў ён.

Кітай разлічвае, што Польшча і Беларусь “будуць ставіцца адзін да аднаго з павагай” і вырашаць “праблемы на мяжы шляхам кансультацый”, заявіла 25 чэрвеня на брыфінгу афіцыйная прадстаўніца МЗС КНР Мао Нінг. Такім чынам яна адказала на пытанне, ці мае намер Пекін спрыяць спыненню “агрэсіўных дзеянняў” Мінска на мяжы.

Дыпламат выказала надзею, што бакам удасца пазбегнуць “эскалацыі напружанасці”.

Прэзідэнт Польшчы Анджэй Дуда на перамовах са старшынём КНР Сі Цзіньпінам 24 чэрвеня ў Пекіне закрануў пытанні, звязаныя з “ціскам, гібрыднай атакай”, якую “беларускія ўлады праводзяць на польскай мяжы з 2021 года”. Па выніках сустрэчы палітык сказаў журналістам, што “падрабязна абмеркаваў сітуацыю” з кітайскім лідарам, паведаміў аб праблемах трансгранічнага руху, якія ўзніклі праз “негатыўнае стаўленне беларускіх уладаў”.