З Нікарагуа падпісана кантрактаў на 85 млн долараў, Галоўчанка назваў гэта “сапраўдным прарывам”

19 ліпеня, Позірк. Кантракты на 85 млн долараў падпісаны 18 ліпеня паміж Беларуссю і Нікарагуа, паведамляе прэс-служба ўрада.

Адзначаецца, што “ўпершыню былі заключаны такія буйныя здзелкі ў Цэнтральнай Амерыцы”.

“Падпісаныя сёння дакументы можна лічыць сапраўдным прарывам у двухбаковых адносінах Беларусі і Нікарагуа, — заявіў прэм’ер-міністр Раман Галоўчанка, які знаходзіцца ў гэтай краіне з візітам. — З дня на дзень у Нікарагуа даставяць партыю беларускай грузавой тэхнікі. Сённяшняе падпісанне пагадненняў і банкаўскіх кантрактаў таксама пакладзе пачатак рэалізацыі вялікага праекта па пастаўцы тэхнікі беларускай вытворчасці агульнай колькасцю больш за 700 адзінак у брацкі Нікарагуа”.

18 ліпеня Галоўчанка сустрэўся з дарадцам прэзідэнта Нікарагуа па пытаннях інвестыцый, гандлю і міжнароднага супрацоўніцтва Лаўрэана Факунда Артэга Мурыльё.

Па выніках сустрэчы ён паведаміў, што Беларусь прапануе Нікарагуа “працаваць над перспектывамі супрацоўніцтва ў сферы аграпрамысловага комплексу, медыцыны, фармацэўтыкі, ІТ-тэхналогій, камунальных тэхналогій, праектаў у сферы экалогіі і гэтак далей”. Прэм’ер паабяцаў, што беларускі бок разгледзіць прапанову Нікарагуа па вытворчасці ў гэтай краіне беларускай тэхнікі з перспектывай экспарту ў іншыя дзяржавы рэгіёна.

Таксама Галоўчанка адзначыў, што Беларусь зацікаўленая ў пастаўках з Нікарагуа садавіны, кавы, какава-бабоў, морапрадуктаў. Паводле яго слоў, зараз паміж прадстаўнікамі беларускага і нікарагуанскага бізнесу вядуцца перагаворы. Кіраўнік урада спадзяецца, што “яны скончацца падпісаннем канкрэтных камерцыйных кантрактаў”.

Галоўчанка падкрэсліў, што ў дзвюх дзяржаў “падобныя погляды на падзеі ў свеце”: “Мы, як і Нікарагуа, не прымальны дыктату, навязвання чужой нам ідэалогіі”. У выбудоўванні адносін на міжнароднай арэне зыходзім з прынцыпаў суверэннай роўнасці і безумоўнай узаемнай павагі”.

Прэм’ер-міністр уручыў Мурыльё сертыфікат на атрыманне беларускага аўтамабіля хуткай дапамогі, укамплектаванага “сучаснымі сродкамі надання меддапамогі”, а таксама “гранты на навучанне нікарагуанскіх студэнтаў у Беларусі”.

Галоўчанка наведвае Нікарагуа ў рамках візіту па краінах Лацінскай Амерыкі. Да гэтага ён пабываў у Венесуэле і на Кубе.

Аб “дынамічным пашырэнні двухбаковага супрацоўніцтва як у палітычнай, так і ў гандлёва-эканамічнай сферах” заявіў (https://pozirk.online/be/news/96381) Аляксандр Лукашэнка, віншуючы 19 ліпеня прэзідэнта Нікарагуа Даніэля Артэгу з 45-годдзем перамогі Сандынісцкай народнай рэвалюцыі.

18 ліпеня 2023 года Лукашэнка адобрыў праект пагаднення паміж урадамі Беларусі і Нікарагуа аб узаемнай адмене візавых патрабаванняў. Дагавор набыў моц сёлета ў лютым.

Галоўчанка летась 14 ліпеня падпісаў праект міжурадавага пагаднення з Нікарагуа аб стварэнні сумеснай камісіі па гандлёва-эканамічным супрацоўніцтве.

Тавараабарот паміж Манагуа і Мінскам настолькі малы, што амбасада Беларусі на Кубе (па сумяшчальніцтве адказвае за адносіны з Нікарагуа) не прыводзіць ніякіх лічбаў. Схематычны графік на сайце дыпмісіі дае зразумець, што аб’ём гандлю паміж дзвюма краінамі з 2017 года пераважна падаў, склаўшыся ў 2021 годзе прыкладна на ўзроўні 1,2 млн долараў (большая частка прыпадае на беларускі экспарт).

Нікарагуа традыцыйна падтрымлівае Беларусь і Расію на міжнародным узроўні, напрыклад, не прымаючы накіраваныя супраць іх рэзалюцыі Генасамблеі ААН. Некаторыя эксперты сцвярджаюць, што ўлады краіны фактычна гандлююць сваім палітычным голасам на міжнароднай арэне.

Лукашэнка на сустрэчы з кіраўніком МЗС Нікарагуа Дзянісам Манкада Каліндрэсам 19 траўня 2023 года ў Мінску адкрыта захапляўся палітычнай дзейнасцю аўтарытарнага прэзідэнта Артэгі.