У мінскім аэрапорце затрымалі замежніка з падробленым пашпартам

22 ліпеня, Позірк. Грамадзяніна Ірана з часткова падробленым пашпартам затрымалі 19 ліпеня ў нацыянальным аэрапорце Мінск пры афармленні на рэйс у Дубай, паведамляе прэс-служба Дзяржаўнага пагранічнага камітэта.

Паводле інфармацыі ведамства, падчас спецыяльнай праверкі было выяўлена, што ў дакуменце заменена фатаграфія ўладальніка.

За спробу незаконнага перасячэння мяжы мужчыну пагражае штраф да 100 базавых велічыняў (4.000 рублёў). За выкарыстанне падробленых дакументаў прадугледжана крымінальная адказнасць — абмежаванне волі на тэрмін да 2 гадоў.

Замежрніка змясцілі ў ізалятар часовага ўтрымання ГУУС Мінгарвыканкама да высвятлення асобы.

Летась у мінскім аэрапорце затрымалі больш за 30 парушальнікаў заканадаўства, якое рэгламентуе правілы перасячэння мяжы.