Не навіна, што памежнікі Беларусі дапамагаюць нелегальным мігрантам — начальнік САДМ Літвы

24 ліпеня, Позірк. На мяжы з Беларуссю “назіраецца невялікі рост патоку нелегальных мігрантаў”, але сітуацыя знаходзіцца пад кантролем, заявіў 24 ліпеня начальнік Службы аховы дзяржмяжы (САДМ) Рустам Любаеў.

“Мы пакуль не драматызуем гэта, — цытуе яго партал навінаў Delfi. — Таму што тэхнічныя сродкі і магчымасці, якія ёсць на сёння на мяжы, даюць нам магчымасць фіксаваць усе парушэнні дзяржмяжы і затрымліваць нелегальных мігрантаў”.

Для літоўскага боку, зазначыў кіраўнік САДМ, “не навіна”, што беларускія пагранічнікі “дапамагаюць групам нелегальных мігрантаў”.

“Мы таксама заўважылі тэндэнцыю, што гэтых нелегальных мігрантаў перавозяць з літоўска-беларускай да польска-беларускай мяжы або наадварот, або да латвійскай мяжы”, — падкрэсліў Любаеў.

Кіраўнік службы спрагназаваў рост выпадкаў нелегальнага перасячэння мяжы з набліжэннем зімовага сезона.

Рэкордная за апошнія восем месяцаў колькасць спробаў нелегальнага пераходу мяжы з боку Беларусі — 40 — спыніла 20 ліпеня САДМ, сведчыць праведзены “Позіркам” аналіз яе штодзённых звестак.

9 лістапада 2023 года была папярэджана 41 спроба незаконнага пранікнення, з тых часоў іх колькасць нязменна была меншай або — як 18 і 19 ліпеня — была роўная нулю.

За 20 дзён ліпеня літоўскія службы папярэдзілі 80 спроб (у чэрвені — 36, у траўні — 34, у красавіку — 47).

З пачатку года было зафіксавана 333 спробы.