Снапкоў абмеркаваў у Маскве пастаўкі калійных угнаенняў на “ключавыя рынкі збыту”

24 ліпеня, Позірк. Пытанні паставак хлорыстага калію на “ключавыя рынкі збыту” абмеркаваны 24 ліпеня ў Маскве на сустрэчы віцэ-прэм’ера РФ Дзмітрыя Патрушава і першага намесніка прэм’ер-міністра Беларусі Мікалая Снапкова

Як паведамляе прэс-служба расійскага ўрада, бакі адзначылі, што доля дзвюх краін у сусветнай вытворчасці калійных угнаенняў у 2023 годзе склала каля 35%, з 68 млн тон агульнага аб’ёму.

На думку Патрушава, гэта дае магчымасць “не толькі поўнасцю забяспечваць унутраныя патрэбнасці, але таксама накіроўваць значныя аб’ёмы на экспарт”.

Амбасада Беларусі ў Расіі распаўсюдзіла па выніках сустрэчы прэс-рэліз, аналагічны расійскаму.

Аб тым, што Беларуская чыгунка (БЧ) будзе нарошчваць аб’ём грузаперавозак у Кітай і Вялікі порт Санкт-Пецярбурга, паведаміла намеснік начальніка службы грузавой працы і знешнеэканамічнай дзейнасці ўпраўлення Беларускай чыгункі (БЧ) Ірына Каплёўская на прэс-канферэнцыі ў Мінску 24 ліпеня.

Паводле яе слоў, цяпер праз порт горада ідуць беларускія нафтапрадукты і “львіная доля калійных угнаенняў”.

ААТ “Беларуськалій” знаходзіцца пад санкцыямі ЕС з 2022 года. З-за іх уплыву нарвежскі пастаўшчык калія Yara — адзін з найбуйнейшых у Еўропе пакупнікоў беларускіх угнаенняў — абвясціў аб спыненні супрацоўніцтва з “Беларуськаліем”.

У траўні — чэрвені 2022 года на фоне ўведзеных санкцый беларускі вытворца пачаў прадаваць сваю прадукцыю са зніжкамі 30–50%.

Член Савета Рэспублікі Нацыянальнага сходу Міхаіл Русы 6 чэрвеня ў Мінску на канферэнцыі па пытаннях дасягнення Мэт устойлівага развіцця заявіў, што “Беларусь гатова прадаваць танныя ўгнаенні”.

Выданне “Коммерсантъ” паведамляла, што прадпрыемства заключыла дамову з аператарам “Кістоун Лоджыстыкс” (Санкт-Пецярбург) на перавалку 2 млн тон калію ў кантэйнерах да канца 2023 года, акрамя таго, пастаўляе ўгнаенні ў кантэйнерах па расійскай чыгунцы ў Кітай.

Сцвярджалася, што пастаўкі беларускай прадукцыі наносяць шкоду расійскім вытворцам і патэнцыйна ўдараць па замежных, паколькі, паводле звестак крыніц медыя ў гэтай сферы, “Беларуськалій” дэмпінгуе, імкнучыся павялічыць аб’ёмы паставак.

8 чэрвеня 2023 года Беларуская калійная кампанія (БКК) заявіла, што канадскі пастаўшчык угнаенняў Canpotex разбурае рыначную раўнавагу і дае ілжывы сігнал сусветнаму рынку калію, зніжаючы цэны на прадукцыю.

Выручка ад экспарту калійных угнаенняў — значны складнік даходнай часткі дзяржбюджэту Беларусі.

Асноўныя імпарцёры беларускага калію — Бразілія, Кітай і Індыя.

Генеральны сакратар Арганізацыі Аб’яднаных Нацый Антоніу Гутэрыш на пасяджэнні Савета бяспекі ААН 5 траўня 2023 года заявіў аб неабходнасці зняцця санкцый з экспарту беларускіх і расійскіх угнаенняў. Паводле яго слоў, на сустрэчах з расійскім і ўкраінскім лідэрамі ён узнімаў пытанне харчовага крызісу, які з прычыны вайны ва Украіне ўзнік у Сенегале, Нігеры і Нігерыі.

Дэмсілы Беларусі выступаюць супраць такога рашэння.