Палкоўнік Ротчанкаў узначаліў ДАІ

25 ліпеня, Позірк. Палкоўнік міліцыі Віктар Ротчанкаў стаў кіраўніком Галоўнага ўпраўлення Дзяржаўтаінспекцыі МУС, паведамляе прэс-служба ведамства.

Прадстаўляючы новага начальніка ДАІ, міністр унутраных спраў Іван Кубракоў звярнуў увагу, што той “пачынаў інспектарам, прайшоў усе службовыя прыступкі, да апошняга часу быў намеснікам начальніка глаўка”.

“На адказную пасаду прызначаны той, хто ведае ўсе нюансы працы”, — заявіў кіраўнік МУС.

Кубракоў сцвярджае, што “ў грамадзян склалася станоўчае меркаванне аб беларускай Дзяржаўтаінспекцыі”, “такія ж уражанні не раз выказвалі і прадстаўнікі іншых міністэрстваў і ведамстваў краіны”.

Паведамляецца, што МУС чакае ад Ротчанкава “новых ініцыятыў”.

“Шэраг пытанняў абмеркавалі адразу, уключаючы тэхнічнае абсталяванне службы. У прыватнасці, размова ішла аб далейшым укараненні ў практычную дзейнасць квадракоптараў. Таксама былі прадэманстраваныя ўзоры новай формы дарожна-патрульнай службы”, — адзначае ведамства.

“Прынцыповага стаўлення да парушальнікаў і жорсткіх мер рэагавання” запатрабаваў Кубракоў 3 красавіка гэтага года на інструктажы мінскай Дзяржаўтаінспекцыі.

Асабліва, паводле яго слоў, гэта тычыцца матацыклістаў і пешаходаў на “сродках персанальнай мабільнасці”.

Чыноўнік падкрэсліў, што ў пытаннях “забеспячэння парадку на дарогах Мінска і асабістай бяспекі супрацоўнікаў ДАІ” атрымалася дамагчыся станоўчай дынамікі: “Знізілася колькасць ДТЗ, загінулых і параненых у іх грамадзян, а таксама колькасць аўтааварый па віне нецвярозых кіроўцаў”.

Міністр асабіста прыняў удзел у інструктажы на фоне гібелі на дарозе супрацоўніка Дзяржаўтаінспекцыі. 28 сакавіка недалёка ад вёскі Стытычава (Пінскі раён Брэсцкай вобласці) грузавік МАЗ наехаў на 35-гадовага супрацоўніка ДАІ.

2 красавіка стала вядома, што за негатыўныя каментары пра загінулага міліцыянера затрымана не менш за пяць чалавек.

Ротчанкаў на 86-й сесіі Камітэта па ўнутраным транспарце Еўрапейскай эканамічнай камісіі ААН 21 лютага ў Жэневе (Швейцарыя) заявіў, што ў Беларусі “адзін з лепшых у свеце” тэмпаў зніжэння дарожна-транспартнага траўматызму.

Паводле звестак ДАІ, у 2023 годзе на дарогах Беларусі загінула 434 чалавекі, менш за ўсё за ўсю гісторыю вядзення ўліку (у 2022 годзе — 466).