Рэальны заробак у Беларусі расце на фоне высокага попыту на працоўныя рэсурсы, адзначае ЕАБР

29 ліпеня, Позірк. Рэальны заробак у Беларусі ў чэрвені вырас на 11,2% у гадавым вымярэнні “на фоне высокага попыту з боку кампаній на працоўныя рэсурсы”, гаворыцца ў штотыднёвым макрааглядзе Еўразійскага банка развіцця (ЕАБР).

“Пры зніжэнні занятых (-0,8% год да года па выніках траўня), колькасць вакансій вырасла на 16,7% з пачатку года, абнавіўшы гістарычны максімум і дасягнуўшы 3,8% ад працуючага насельніцтва. Пры гэтым узровень беспрацоўя ў другім квартале знізіўся да гістарычнага мінімуму ў 3%”, — адзначана ў дакуменце.

Намінальны налічаны сярэдні заробак Беларусі ў чэрвені 2024 года склаў 2.270 рублёў — на 50,8 рубля больш (+2,29%), чым у траўні (2.219,2).

Праведзены раней “Позіркам” аналіз даных Нацыянальнага статыстычнага камітэта паказаў, што ў беларускай эканоміцы ў гэтым чэрвені было занята 4 млн 113,6 тыс. чалавек — на 1,4% менш (-16,5 тыс.), чым у студзені, і на 0,8% менш, чым у чэрвені 2023 года (-34,5 тыс.).

Акадэмічны дырэктар даследчага цэнтра BEROC Леў Львоўскі, прагназуючы на просьбу “Позірку” сітуацыю на 2024 год, адзначыў, што праз вельмі нізкае беспрацоўе прадпрыемствы вымушаныя браць не кампетэнтнага работніка, а “таго, каго могуць знайсці”.

“Мы бачым, што рост заробкаў кратна апярэджвае рост эканомікі. І калі яна яшчэ не аднавілася да ўзроўню 2021 года, то заробкі ў рэальным выражэнні выраслі да гістарычнага максімуму”, — сказаў ён.